首頁 arrow 綠色短評 arrow 到底是養奸?抑是資匪?

到底是養奸?抑是資匪? PDF 列印 E-mail
發表者 李南衡   
2014/09/09, Tuesday
若照半個月來,台灣各家媒體根據「高層」、「知情人士」、「調查局有關人士」所透露的消息,陸委會副主委張顯耀涉嫌洩密、奸諜(美中台三面奸諜)、匪諜(通過第三者台商the̍h極機密交͘中國共匪)等罪名。八月二八,台北地檢署有約談陸委會三位處長kah張顯耀的機要秘書、幕僚,約談張顯耀十七點鐘了後,二九早起透早兩點外無保請回。Chit中間台北地檢署有去搜索張顯耀的厝等三位所在,有查扣一寡重要的犯罪證物。 逐個攏目睭金金tehe看chit-ê涉嫌「洩密」、「奸諜」、「匪諜」的人逐工佇外口pha-pha走,嘴chiūⁿ tio̍h開一場記者招待會,閒閒無代誌tio̍h去電視台接受訪問。一點仔都無sêng有大案在身的重犯。若照陸委會王郁琦主委的講法,七月底接tio̍h密告強烈懷疑張顯耀有涉嫌國安洩密、甚至懷疑伊是洩漏國安機密hō͘中國的「匪諜」,八月初報告行政院江宜樺院長。講beh請行政院長安排一個國營企業的董事長hō͘張顯耀。   九月初一,行政院江宜樺院長kah媒體茶會的時,解釋處理張顯耀案的過程,講當一個部屬涉嫌不法抑是違紀的时,標準作法是調整職位,而且採用比例原則的方式處理,調整職務是為tio̍h避免事態擴大。記者問講是按怎想beh安排一個油洗洗的國營企業董事長hō͘張顯耀咧?江院長應講:為顧tio̍h張顯耀tio̍h「養家餬口」。話一下講出,害一大堆記者險險跋跋倒。   啥物叫作「養家餬(hô͘)口」?「養家」的意思是伊的厝裡頭嘴濟tio̍h養飼,咱除了知影張顯耀有一位老母年老身體欠安(che是八月十六行政院所公布的張顯耀請辭的理由-「家庭因素」),咱m̄知有幾個某子tio̍h靠伊撫養。若照新聞所報的,張顯耀有三棟豪宅,應該是有氣力撫養一個家庭。「餬(hô͘)口」的意思是:一個人勉強維持生活的度嘴飽,張顯耀應該koh khah無問題。   忽然間想起一年來落台的部長,勞動部長潘世偉kah教育部長蔣偉寧落台了,轉去大學教冊,大學那像是糞埽桶咧;法務部長曾勇夫、做無七工的國防部長楊念祖落台了,轉去食家己;經濟部長張家祝落台了上大的貢獻是行政院隨時決定無條件支持高雄十六億的重建預算。Che三位部長落台攏無聽講有啥物「養家餬口」。那會干單副部長級有可能牽涉tioh「洩密」、「奸諜」、「匪諜」的張顯耀,tio̍h考慮伊「養家餬口」咧?伊若真正是「匪諜」,按呢是「資匪」neh!敢會原本是beh講「養奸」(養奸諜、養hō͘大尾肥肥?)、「糊(kô͘)口」(糊伊的嘴、叫伊m̄-thang kā一寡秘密講講出來),行政院江宜樺院長講傷緊煞講m̄-tio̍h去的?
 
< 前一個   下一個 >