首頁 arrow 綠色短評 arrow 王小棣導演,讚!

王小棣導演,讚! PDF Print E-mail
Written by 李南衡   
Friday, 26 September 2014
九月二四,國家文藝獎頒獎典禮了,照以往的例,馬英九總統會kah全體本屆得獎者合影。Beh翕相的時才發現舞台頂減一位得獎者王小棣(tē)導演。因為伊拒絕kah馬英九總統作夥翕相,堅持講「有代誌」,其實是佇休息室小歇睏一下,技術性閃避kah馬總統作夥翕相,等馬總統離開了後伊才koh轉來會場,接受媒體翕相kah採訪。伊按呢做,主要是留͘主辦單位一點點仔面子。若比起三年前的曾道雄教授實在加真細膩加真糼秀。 三年前仝款得tio̍h國家文藝獎的曾道雄敎授,領獎了,當面拒絕上台去接受馬英九總統致贈的建國百年紀念筆,koh拒絕起去舞台頂kah馬總統作夥翕相,馬總統落來舞台腳beh kah伊握手,曾教授「拱手」(kióng-chhiú)表示無愛kah馬總統握手,當面hō͘ 馬英九總統一頓粗飽!   王小棣導演ùi陳玉峰教授的手接受獎項的時,兩遍激動流目屎講:「現在是台灣面臨上大的內憂外患,體質mā是上虛弱的時刻。」伊強調,台灣是一個足需要hông細膩珍惜的小koh súi的國家。「台灣雖然細,卻tio̍h承受歷史重擔。Tio̍h思考愛按怎來保護咱美麗的國家,民主自由的生活kah經濟模式,農產品kah環境保護是逐個努力的方向。」針對國家紛紛的亂象,伊拳頭母thēⁿ ân-ân講:「台灣加油!」   王小棣導演的作品真濟攏是描寫小人物的內心kah情緒,因為伊關心in。伊bat得過電視金鐘獎編劇獎、金鐘獎導播獎、金鐘獎最佳戲劇節目獎、金鐘獎戲劇節目編劇獎。伊講導演的工作就是一直teh修人生、社會的學分。因為chit幾年政府表現了太差,致使藝文工作者tio̍h一直關心各種議題,無法度專心佇家己的「正業」。各界聲授大埔事件批評馬政府的時,伊講:「為啥物beh拆大埔?逐個tio̍h看清楚,啥人食飽傷閒beh拆政府?因為政府做了傷過離譜。民主原本tio̍h應該有好的公僕,hō͘人民享福m̄是hō͘人民食苦。」「逐個攏感受tio̍h台灣的退步,hō͘人誠慼(chheh)心!koh khah重要的是,台灣發生了一齣koh一齣的迫害事件,已經hō͘ 人無度安心工作,che攏已經拄tio̍h作一個人的底線loh!」伊反對政府推行欠缺人民參與、資訊無透明的都更,反對完全無理性思辯的核能政策,伊責備政府那會tàng目睭金金看華隆、關廠工人teh受苦.?伊願意為tio̍h大埔強拆案,kah逐個作夥來拆政府!講kah激動的時,伊氣kah講:「咱的國家那會chiah呢爛!我hō͘ in逼kah想beh出來選總統!」   有骨氣、有疼心的王小棣導演,讚!
 
< Prev   Next >