首頁 arrow 綠色短評 arrow 香港雨傘革命是teh革啥物命咧?

香港雨傘革命是teh革啥物命咧? PDF Print E-mail
Written by 李南衡   
Friday, 03 October 2014

九月二八暗,香港「佔領中環」提早發動,有六萬人聚集。透早,香港警方向群眾拍八十七粒「催淚gá-suh彈」,koh向群眾chōa「番薑仔噴霧」。群眾緊去chhōe雨傘來tu來遮,隨時有人發動捐送雨傘,上濟是黃色的。第二工香港落大雨,逐個雨傘展開,形成一個真súi的黃色雨傘海,人才叫伊一個響亮的名號:「雨傘革命」。香港政府用暴力對付手無寸鐵的學生群眾,煞引起koh khah濟人參與,十月初一,香港慶祝中華人民共和國國慶,佔中抗議的群眾超過二十萬人。

香港雨傘革命那會舞kah chiah大齣bē收山咧?就是為tio̍h抗議中國政府無信用。1997年香港回歸中國的時,《基本法》白紙寫烏字:「一國兩制」,五十年bē改變香港的生活方式;第二是答應2017年,香港人會使普選「特首」。   一國兩制:回歸中國chit十七年來,hō͘香港人深深感受tio̍h愈來愈濟的政治箝制,那像中國人代會所講的:「香港的高度自治,是中央所授權的,中央beh hō͘恁偌濟權力,香港特區才有偌濟權力。」中國人拚來香港買厝炒房,炒kah香港人無才調買厝;一大陣中國人來香港觀光買高級品,香港人無趁tio̍h錢,因為中國旅行團ùi遊覽車、免稅店、餐廳,甚至所tòa的飯店,攏總是中國人所投資的「一條鞭」。Che kah中國人佇台灣的作法完全仝款,香港人的心情咱完全會tàng理解。愈來愈濟香港人無認同家己是「中國人」,中國中央政府驚tio̍h,想beh佇香港中小學實施洗腦愛國教育,遭受tio̍h強烈反對,今年才無實施。中國強調的是「一國」,香港期待的是「兩制」,兩旁完全bē對同,che那像中國對台灣的「九二共識」,中國強調的是「一個中國」,台灣期待的是「各表」,差真濟。   特首普選:原本答應2017年香港人會使普選特首,但是今年六月十一,中國人代會發表「『一國兩制』佇香港特別行政區的實踐白皮書」講:香港特首候選人tio̍h由一個委員會提名三個人,hō͘人民投票來選,候選人tio̍h愛國愛港才會使。根本m̄是真正的普選。八月三十一,香港通過人代會的方案,才hō͘計劃歸年「用愛kah和平佔領中環」的運動趕緊發動。九月二二,香港二十二間大專院校部分學生開始罷課五工表示抗議,仝日,泛民主派團體學民思潮發動中學生佇政府總部外口進行罷課集會一工,數十名大專學生lòng入去廣場,第二工警方kā hiah-ê學生掠去。九月二八半暝一點半,「佔中」運動佇金鐘政府總部發動,六萬市民拚去支持。透早,警方連續拍八十七粒「催淚gá-suh彈」kah「番薑仔噴霧」攻擊群眾。佔中運動才會愈來愈濟人愈擴大範圍,舞kah bē收山。   雨傘革命叫特首梁振英落台是喝爽的,事實是teh革中國政府無信用的命!
 
< Prev   Next >