首頁 arrow 綠色短評 arrow 「海協會」假khong,「海基會」teN3戇!

「海協會」假khong,「海基會」teN3戇! PDF 列印 E-mail
2008/11/13, Thursday
        中國毒奶佇台灣所造成e5災害超過當年e5中國SARS。九月十六金車公司主動送產品去食品工業發展研究所檢驗有陽性反應,金車be7放心koh送一遍去檢驗,確認金車有八項沖泡式食品含有三聚氰胺。金車公司隨時全面回收而且通知衛生署去in公司清查庫存。

        屬於植物性蛋白e5奶精竟然含有三聚氰胺,是世界頭一遍聽tioh8 e5,莫怪衛生署會起緊張,下令平平仝款ui3中國山東都慶公司進口原料e5五間公司,tioh8檢驗in進口e5原料是m7是含有三聚氰胺。真不幸,除了進口大豆鈦e5台灣多肽公司無問題以外,六合化工進口e5奶精及麥芽精、佳泰食品進口e5奶精、汎昇實業進口e5奶精、三億食品進口e5奶精,檢驗結果攏有問題!代誌大條問題嚴重!因為這四間公司賣原料hou7下游工廠,製造e5食品有幾十種,包括即溶咖啡、奶茶、麵包、速食糜、冰淇淋、布丁、濃湯、速食麵、速食麥片等沖泡式品,以及保久奶、調味乳、優格、調味醬、高蛋白食品、豆製類e5素肉等素食產品。

  續落去,台灣各大賣場及超級市場,連鞭落架連鞭上架koh再落架、有毒變無毒koh變有毒,為tioh8食品會使含有幾ppm e5三聚氰胺,全台灣舞到花屑屑。有人認為食品中根本無應該摻e5就無應該有,有人認為若m7thiau-工摻e5,真少量會使接受。偌濟量才算真少量?有人主張2.5ppm、有人主張2ppm、有人主張嚴格到0.05ppm。咱衛生署聽tioh8中國對台辦發言人講,山東都慶公司賣hou7台灣e5奶精檢驗了無含三聚氰胺,煞細聲m7敢出聲。無擔當e5衛生署長林芳郁煞落台免行禮。咱派一陣人去中國講是beh去查毒奶事件,結果是啥物ma7無做、尾挹le3轉來。Koh khah可惡e5是允准中國都慶公司來台灣chhoe7金車公司theh8樣品轉去,講啥物in無「人為」摻三聚氰胺!

  十月廿八報導講:毒奶事件,海協會首度向咱致歉。講傳真來e5批指出:「三鹿牌無合格嬰幼兒奶粉事件已經證實是一件不法分子製造e5食品安全事件。因為按呢hou7台灣消費者及廠商所造成e5困擾及損失,我會特請貴會轉達台灣民眾e5歉意。」喂!中國是teh假啥物khong!歸e5毒奶事件e5罪魁禍首是山東都慶公司、也就是中國對台辦發言人講原料檢驗無問題、咱檢驗問題了了hit間都慶公司!鬧月外日攏是「都慶」奶精,那會變作「三鹿牌」奶粉咧?

  中國海協會假khong講「三鹿牌」奶粉,咱台灣海基會董事長江丙坤配合teN3戇講:雖然有khah慢一絲仔,ma7肯定大陸方面e5做法。碗糕咧!咱講「都慶」伊講「三鹿」。拜託江丙坤董事長暗唸「都慶」一百遍,看記會起來抑be7

最後更新 ( 2008/11/13, Thursday )
 
< 前一個   下一個 >