首頁 arrow 綠色短評 arrow 馬英九講的hit隻歹蟲chit-má m̄知按怎?

馬英九講的hit隻歹蟲chit-má m̄知按怎? PDF 列印 E-mail
發表者 李南衡   
2014/10/08, Wednesday
馬政府上大的本事就是部長直直落台,算算一下已經超過十個ah!最近三個月tio̍h有六個部長跋落馬。跋落馬的奇形怪狀,算是台灣官場的特色,有涉嫌「不倫」之戀的、有論文抄人的的、有涉嫌偽造論文審查案的、有牽涉「師生戀」的,上值的是「馬王政爭」承tio̍h拳頭屁的前法務部長曾勇夫。理由雖然五花十色,khah遺憾的是無一個是為tio̍h政策負責落台的。 八月頂半月,無人piak孔那像平安無事,閒閒無代誌,台灣有一句俗語話講:「家己刣趁腹內。」刣一個副部長mā好,八月十六,行政院新聞稿講:張顯耀因為「家庭因素」請辭陸委會特任副主委,聽講有安排一個國營機構董事長beh hō͘伊,張顯耀當場拒絕。第二工,張顯耀講是「長官kā講才知影家己辭掉陸委會副主委。」按呢bē直ah!續落去刀光劍影,刣kah霧煞煞,總是攏無看tio̍h殺手的身影,昨昏有聽tio̍h「知情人士」出聲、今仔日是調查局有關人士放調、明仔載變作「高層」透露消息。張顯耀的罪名mā日日翻新,頭一個講是「洩漏國家機密」、連機密交互啥物台商mā畫kah有影有跡;第二個講是hō͘「共匪」吸收去作「匪諜」;講無兩工、忽然間變作「中美台三面間諜」;甚至講「馬習會」破局tio̍h是因為張顯耀洩漏秘密,真正是「Bē生牽拖厝邊」。   老實講,無人知影張顯耀到底犯tio̍h啥物罪、伊到底是啥物腳賬(kioh-siàu)?逐個紛紛猜疑的時、全案台北地檢署猶teh偵查中,八月二八,馬英九總統完全無管「無罪推定」原則,講陸委會主委王郁琦處理了真適當,伊用「歹蟲」kah「啄木鳥」作比喻,強調兩岸關係發展那像一欉大樹的成長,一旦發現樹頂有「歹蟲」,tio̍h應該用「啄木鳥」的態度,kā「歹蟲」chhōe出來而且kā除掉!   九月二二,陸委會主委王郁琦佇立法院成作朝野立委跑轟的對象,逐個都問講舞歸個月,張顯耀若無罪,你beh按怎?王郁琦講:「應該負的責任我一定會負,假使張顯耀無罪,我願意向伊會失禮。」伊講張顯耀若有罪,伊mā有識人不明的責任。若照馬總統的「歹蟲」kah「啄木鳥」的講法,我看是王郁琦chit隻「啄木鳥」看tio̍h樹孔內一個影,聽馬總統講是「歹蟲」,tio̍h一直啄一直啄一直啄,哇害囉!啄tio̍h一個尾溜拖出來,那會m̄是「歹蟲」?敢會是「青竹絲」?Koh拖koh拖,那會愈拖愈大尾?那會拖出一尾「飯匙銃」?我會無命囉﹗   台灣每個月都有大代誌發生,馬總統想講歹記持的台灣人,隨時bē記得頂個月發生啥代誌、政府有處理好勢抑無。免偌久,逐個會bē記得張顯耀是啥人。所以咱久久ah tio̍h愛小問一下:馬英九講的hit隻歹蟲chit-má m̄知按怎?
 
< 前一個   下一個 >