首頁 arrow 綠色短評 arrow 落屎馬政府講beh抵制烏心產品!

落屎馬政府講beh抵制烏心產品! PDF 列印 E-mail
發表者 李南衡   
2014/10/17, Friday
一年內舞三遍烏心食品,一遍koh一遍叫大賣場、超級市場烏心商品搬落架仔,頂新集團ùi假油到phun油攏有份,chitkoh主演工業用油kah飼料油假豬油事件,台灣人已經氣kahbē tiâu,放調beh kā中國國民黨chit-ê烏心政府搬落架仔。馬英九總統才chhoah-tio̍h十月十三暗時召開跨部會的食安的國安會議。結論有兩點:第一,成立「食品安全辦公室」,第二,呼籲民眾kah政府聯手,對烏心產品kah企業的烏心行為,查辦、抵制到底。 行政院下面原本tio̍h有「食品藥品安全會報」,由行政院副院長毛治國主時,今年七月初八,講beh結合機關力量、強化應變kah溝通,設立「食品安全推動工作小組」。九月初四tio̍h piak「phun油事件」,十月初八,台南地檢署去查tio̍h頂新集團下面的正義油品是用「飼料用油」等烏心油假作「食用豬油」銷售。頂新集團的魏應充ùi 2001年八月至2003年八月擔任行政院食品安全會報委員,足拄好,頂新集團下面的正義油品tio̍h是ùi hit陣,才開始ùi越南進口飼料用油。Chit遍專工轉來台灣串供的越南「大幸福」油商楊振益,講伊轉來開會了tio̍h beh轉去越南,無疑誤拄tio̍h檢調搜索傳訊,伊坦白講頂新早早tio̍h知影in買的是飼料油。「食品藥品安全會報」kah伊下面的「食品安全推動工作小組」無半撇,chit-má才koh新成立一個「食品安全辦公室」敢to̍h有法度?咱上好是mài寄望in會有啥物成績,對烏心政府khah bē失望受氣。   講tio̍h抵制商品,hō͘咱想起「日頭花」運動的第一暗,學生民眾因為無作準備,半暝仔腹肚枵,立法院邊仔的便利商店架仔頂會食得的商品掃kah空空空,獨獨「旺旺」的產品滿滿是無人去動伊。抵制,完全是人民自發te̍k的行為,事實上chit遍已經有真濟消費者、大間公司、大賣場、超級市場進行拒絕頂新集團kah味全所有的商品。抵制,那是政府的代誌?   政府有一大堆執行公權力的公務員,若mài失職,那有hiah濟烏心商品?Ùi越南進口假豬油,咱敢無代表處佇越南負責簽證,敢免檢查文件有作假抑無,出口的產品kah文件有合無?入來台灣,海關敢免檢查是啥物油?海關人員敢攏鼻孔歹去,芳kòng-kòng的油kah臭mo-mo的油敢有影鼻無?台灣本地的回收油每個月有偌濟、一年有偌濟,環保署敢攏無資料?按怎處理?處理了走去tó位敢無一清二楚?那有可能回收油會變作豬油?事先的預防,事後的追查法辦,攏是政府應該做、而且是做會夠的,那會攏做無好咧!   落屎馬政府正事m̄做,招民眾作夥來抵制鳥心商品,m̄驚笑破人的嘴?
 
< 前一個   下一個 >