首頁 arrow 綠色短評 arrow 習近平主席,請尊重台灣人的感情!

習近平主席,請尊重台灣人的感情! PDF Print E-mail
Written by 李南衡   
Monday, 27 October 2014
中國貪污腐敗的狀況非常嚴重,一種是全家猶tòa佇中國國內,一直貪一直貪、貪到出代誌hông掠去關;一種是出代誌進前,趕緊走去外國;另外一種是「裸官」,che是中國官場的特產,就是一個官員,佇中國國內單操一箍人,某子攏移民tòa佇外國,有the̍h tio̍h永久居留權、抑是外國國籍,佇外國買豪華住宅、高級跑車,攏總用現金免分期付款,過相當奢華的生活。根據《美國之音》的報導,現此時tòa佇外國的中國官員家屬超過一百0八萬人。 貪污到hông掠tio̍h上有名的是:2012年薄熙來出代誌,四月二一,日本的《朝日新聞》引述中國政府內部文件講,薄熙來翁某佇海外存款有六十億美金;貪污piak空進前趕緊soan去外國,上有名的例是:1994年十一月,黑龍江省石油公司原總經理劉佐卿,移轉一億人民幣去國外,歸家伙八個人才走去美國;2005年一月,中國銀行黑龍江河松街支行行長高山soan去加拿大,涉案金額超過十億人民幣;2006年福建省工商局原局長周金伙逃走去美國,涉案金額一億人民幣;2012年四月,原遼寧省風城市委書記王國強歪兩億人民幣走去美國。「裸官」上有名的例是:2013年三月piak空hông掠去關的鐵道部運輸局原局長張曙光,佇美國有幾間豪華住宅以外,海外存款超過二十八億美金;中國鐵道部長劉志軍本人kah伊的部屬佇海外的存款總額超過一百八十一億美金,莫怪中國人民kā「鐵道部」的「道」字改作強盜的「盜」字。   十月二十,tī中共四中全會召開的第一工,澳洲kah中國的主要媒體同時發布一個消息,講中國國家主席習近平的「獵狐行動」已經啟動loh!兩國聯手追捕中國走佇外國的貪官,而且beh追繳in轉移去國外的資產。兩國達成一個重點查處「khah無一百人」的名單,包括吉林省前省長高岩kah伊的後生高新源,有貪五億外人民幣;1999年走去澳洲的廈門市前副市長藍甫,2004年走去澳洲的河南省前高速公路管理局長童言白。2013年,國家發展kah改革委員會前副主任劉鐵男hông掠去的時,發現伊歪一億五千萬人民幣,koh有一本澳洲護照。   相信中國國家主席習近平真滿意伊的「獵狐行動」,mā一定真感謝澳洲政府的合作。習近平主席打擊貪腐的決心kah行動,一定會得tio̍h全中國人民的支持kah阿佬。相信澳洲只不過是伊「獵狐行動」的頭一個。   仝款的道理,一寡倒台灣人的錢走路去中國的不肖生理人kah民意代表,希望中國政府會tàng親像澳洲政府按呢,追繳in轉移去中國的資產,滙來還台灣人民,阮一定會足歡喜。習近平主席,請尊重台灣人的感情。多謝!
 
< Prev   Next >