首頁 arrow 綠色短評 arrow Kā頂新魏家趕出台灣!

Kā頂新魏家趕出台灣! PDF 列印 E-mail
發表者 李南衡   
2014/11/03, Monday
四年前宣傳ECFA的時,馬英九講中國國民黨執政兩年外,͘真濟像「頂新」、「旺旺」chit號海翁級「鮭魚返鄉」,表示推動ECFA是台灣的「補藥」是「包tio̍h糖衣的毒藥」。今仔日全台灣͘頂新的垃圾油害kah哀父叫母,才知影原來頂新是一尾足恐怖食人的鯊魚,食kah全台灣血水chho̍p-chho̍p滴。那像台大食品科技所教授孫璐西所講的:應該用「國安法」沒收財產、永遠不准in經營! 除了用烏心油害台灣人以外,仝款可惡的是雙手空空轉來台灣大lián錢,照中央銀行總裁彭淮南的講法,2007年,頂新無the̍h半錢錢(sián-chîⁿ)轉來台灣作實質投資、帶動經濟發展、創造就業機會抑是增加國民所得。頂新轉來發行康師傅「台灣存託憑證」(TDR)得tio̍h一百七十億,koh利用hit筆資金,以一股十二、三箍差不多七十五億的錢買「台北一0一」的三十七筢股權。   頂新才koh用「台北一0一」的股票進行質押,事實上頂新出無九億tio̍h the̍h五席董事、kah副董事長兼總經理的大權經營「台北一0一」。所質押貸款的現金,存放佇某國銀海外分行,才koh用「美金存定單」作買「帝寶」豪宅貸款的副擔保,干單用一筢的現金買九戶帝寶豪宅。台灣那有chit號好光景?   頂日財政部叫頂新魏家退出「台北一0一」的股份,頂新魏家完全無插財政部,董事會開了,才講beh退出經營權。但是猶原保三十七筢的股權,隨時會 koh倒轉來la̍k經營權。政府那像對頂新魏家完全無法伊。事實上政府若mài koh作頂新魏家的門神,為符合全民的心願,大出手kā頂新魏家趕出台灣是足簡單咧!   政府若有心,一個財政部tio̍h足有夠ah。第一,財政部發動國稅局對頂新集團所有的企業全面查數,m̄免特別刁難,只要照步來嚴格查核in的數簿,頂新tio̍h絕對m̄敢koh假siáu。第二,查頂新集團的資金來往流向,看有偌濟錢滙去開曼群島十外間的境外投資公司。第三,財政部已經要求各行庫tio̍h詳細照實填寫頂新集團所有關係企業佇國內銀行的貸款,而且決定邀集各大公股行庫總經理舉行例行性授信業務報告會議。干單一間兆豐商銀-頂新集團上大的債權銀行,貸款hō͘頂新集團一百三十億。頂新集團佇台灣的貸款總額大約有四百八十億,每一間行庫攏完全照步來kā抽銀根,就是所有的貸款到期的攏無beh hō͘伊續約,m̄信頂新集團偌呢大箍偌呢勇!m̄信頂新集團tòa台灣tòa會落去!   有人講,頂新魏家九成的生理作佇中國,才無驚你台灣政府。烏心生理人佇中國按怎大趁錢,咱無欣羨。作惡作毒,自然會有人kā伊修理。Chit種烏心的生理人若會tàng kā趕出台灣,咱tio̍h足萬幸ah!
 
< 前一個   下一個 >