首頁 arrow 綠色短評 arrow 連勝文陣營一陣戇人!

連勝文陣營一陣戇人! PDF Print E-mail
Written by 李南衡   
Monday, 10 November 2014
無黨籍的台北市長候選人柯文哲陣營感覺奇怪,那會in內部的機密會議內容隨時佇連陣營總幹事蔡正元的面冊發表?十一月初四暗十點,chhōe徵信社來建國南路二段某棟大樓,in競選總部政策部辦公室一樓一樓安全檢查。十點半,佇該大樓三樓室內電信箱發現市話跨接器,懷疑是竊聽電話的設備,翕相存證以後,拍電話向大安分局報案。市刑大有去現場採取指紋。發言人簡余晏向媒體說明有chhōe tio̍h市話跨接器、tio̍h是一般所講的「猫鼠仔尾」,但是無chhōe tio̍h錄音器材。十一月初五透早八點外,警方鑑識人員會同中華電信人員去現場測試,確認一樓電信箱有個樣的「T插線」連接三樓電信箱kah九樓柯陣營政策會辦公室的電信箱,九樓拍出拍入的電話,三樓攏會tàngtio̍h,才確認是有hông裝非法竊聽器材。因為chit-ê「跨接器」若一旁接tio̍h音源線、kohtio̍h錄音筆,另外一旁接tio̍h電話線路,若有人夯電話起來,錄音筆tio̍h會自動開始錄音。 Tī第一時間,干單聽講柯陣營的政策部辦公室有hông裝竊聽器,對方陣營若有頭殼,應該講,若是有影有人hông裝竊聽器,無管是siáng裝的,阮大聲譴責chit種非法的行為!真可惜,猶m̄知代誌的真相,中國國民黨提名的台北市長候選人連勝文tio̍h對記者講,假使柯文哲若是烏龍指控,轉移伊家己參與人體器官買賣的醜聞,希望柯tio̍h負責,「退出chit場的選舉。」好佳哉連勝文無講,假使柯陣營若是真正hông竊聽,伊連勝文beh「退出chit場的選舉。」連勝文koh講,柯陣營那會無愛講「是外星人teh kā伊竊聽!」代誌發展到taⁿ猶m̄知是m̄是外星人來kā伊竊聽的,但是台北市警方已經證實九樓柯辦政策部有影hông竊聽。警方組成專案小組全力追查安裝線路的人kah竊聽的人。柯文哲講,有一分證據講一分話。伊自頭到taⁿ攏無指責抑是暗示是啥人裝竊聽器。   第二戇是連陣營的總幹事蔡正元,伊tī第一時間tio̍h講he是柯陣營自導自演的「腳尾飯」事件。事實上,三樓m̄是柯陣營所租的厝,in的人無可能自由出入去創啥物代誌,beh按怎入去裝「猫鼠仔尾」自導自演咧?   第三戇是十一月初五才接連勝文陣營總部的執行副總幹事周守訓,伊講那有人hiah戇去裝hit號二十年前的舊物件。聽起來ká-ná有理,那像講自從發明銃了後,那有人用落伍的刀刣人咧?事實上,chit一年來台灣發生的大細件兇殺案,大部分攏是用刀刣死人的。仝款的道理,若真正beh竊聽,每一種竊聽的器材都有伊可取的所在、好用的所在,m̄是新舊技術的問題。   戇人出聲,人tio̍h 知影伊是戇人!大戇的市民才會選戇人去作市長!
 
< Prev   Next >