首頁 arrow 綠色短評 arrow 按怎揀按怎選咱的縣市長?

按怎揀按怎選咱的縣市長? PDF Print E-mail
Written by 李南衡   
Monday, 24 November 2014
五工後,全台灣tio̍h beh九合一大選,其中上蓋hông注目關心的是縣市長選舉。咱beh按怎揀、按怎選一位咱的縣市長,應該有一個比較khah客觀的標準。 縣市長的人選無管有幾個,干單有兩種人。第一種是舊人,也就是現任想beh拚連任的,今年宜蘭縣長林聰賢、花蓮縣長傅崐萁、台東縣長黃健庭、新北市長朱立倫、桃園縣長升格作桃園市長的吳志揚、台中市長胡志強、嘉義縣長張花冠、台南市長賴清德、高雄市長陳菊。上重要的檢驗方法是看伊任內的政績,你有滿意bò͘?伊頂遍競選的政見攏總有幾條、達成幾條?無達成的理由是啥物,你會當接受bò͘?伊本人抑是伊的副縣長副市長有涉嫌貪污bò͘?伊本人抑是伊的親人有歪哥bò͘?伊chit遍開的選舉支票有可能兌現bò͘?;另外一種是早前bat作過縣市長,過幾年後koh倒轉來選的,像講早前的高玉樹1954年當選台北市長、1957年連任輸黃啟瑞、m̄甘願1964年koh倒轉來拚一下當選,中國國民黨食伊bē消,kā台北市升格作院轄市免選。   另外一種就是新人,頭一遍出來競選縣市長,像台北市長候選人柯文哲、連勝文chit款真正的新人;另外一種是半舊落仔的新人,像講2009年落選的基隆市長候選人林右昌、仝款2009年落選的桃園市長候選人鄭文燦、2005年落選的台中市長候選人林佳龍,仝款2005年落選的澎湖縣長候選人的陳光復,chit遍koh拚出來選,tio̍h看in頂遍落選的原因;另外一種人雖然是新人,但是伊的老父、兄哥bat作過縣市長,看in任內的表現,來判斷伊的子女、後輩會堪得選hō͘伊bò͘?像講早前高雄縣長余登發到伊的新婦余陳月英到伊的孫仔余政憲,抑是雲林縣長張榮味kah今年競選縣長伊的小妹張麗善。Chit三種新人tio̍h看伊本人的政見、資歷經歷,第三種人tio̍h koh看伊bat作過縣市長的長輩的政績。   問題是選舉m̄是完全理性的決定,加減會摻一寡感情因素,像講親成、朋友、同學、同鄉、同事、仝黨、仝意識型態的,無賢無能mā beh選hō͘,咱無話講。但是有一寡人咱絕對mài選hō͘伊的,像講m̄敢用家己的名發烏函攻擊對手的、用恐嚇的話語煽動對立仇恨的、嚴重侮辱對手人格的、用錢買票的、sńg特權的、明明候選人足差猶koh拜託你含淚含血含恨去選hō͘伊的。選舉是公民寶貴的權利,咱tio̍h歡歡喜喜去投咱神聖的一票,選出理想的縣市長。   咱看阿扁作台北市長四年的滿意度一直保持七十幾葩,連任競選結果干單theh tio̍h 45.9葩輸馬英九的51.1葩。有人講,選連任的一定tio̍h看伊的政績,koh講台北市民是上有理性的選民。我聽tio̍h感覺足好笑,罵講:聽伊teh放屁!
 
< Prev   Next >