首頁 arrow 綠色短評 arrow 中國國民黨chit遍穿美國西裝-大輸!

中國國民黨chit遍穿美國西裝-大輸! PDF Print E-mail
Written by 李南衡   
Monday, 01 December 2014
十一月二九,台灣九合一大選,中國國民黨眠夢無想tio̍h會穿美國西裝-大輸!事實上,相信連民進黨mā m̄敢想講中國國民黨會輸kah chiah呢土!會記得選前,民進黨喝講希望佇原本執政的六個縣市,上起碼tio̍h 增加兩席變作八席縣市長,拚看有九席抑無,希望會tàngtio̍h十席縣市長,按呢tio̍htàng「以地方保圍中央」。 選舉的結果是台北市hō͘無黨籍的柯文哲嬴去,比柯營總幹事姚立明原本所預測的八十萬票koh加五萬、大嬴連勝文的六十萬票,得票率56%對41%;民進黨佇原本六個縣市的基礎上,基隆市民進黨的林右昌以十萬票對五萬票、得票率53.2%;桃園市穩穩的現任吳志揚,無疑誤煞hō͘民進黨的鄭文燦嬴三萬票、失去市長大位;新竹市民進黨的林志堅以一千票之差嬴去;台中市民進黨的林佳龍the̍h八十四萬票大嬴中國國民黨現任市長胡志強的六十三萬票、得票率57%;彰化縣民進黨的魏明谷大嬴中國國民黨提名的林滄敏十萬票、得票率53.7%;民調一直嬴面的中國國民黨的嘉義市長陳以真the̍h tio̍h六萬六千票,輸hō͘七萬四千票民進黨的涂醒哲,真濟人攏怪中國國民黨主席馬英九,十一月二三,馬英九專工去嘉義市beh kā陳以真輔選,陳以真驚hō͘民調9%的馬總統帶衰去,走去bih kah hō͘人chhōe無伊,馬總統足好意,堅持beh kah陳以真握手、替伊助選。十一月二五,馬英九koh拚去嘉義陪陳以真掃街。第二工,漫畫家魚夫有畫一張漫畫,馬英九佇台仔頂kā陳以真輔選,邊仔有人喝講:Kā告,告伊「企圖hō͘人落選!」咱m̄知真正落選的陳以真會去告馬英九抑bē?民進黨提名的澎湖縣長陳光復佇澎湖經營十年,chit遍才以二萬九票嬴兩萬三千票的對手。加原本民進黨執政的六個縣市長,加chit遍拚嬴的七個變作十三個縣市長,當然是大嬴!   原本民進黨執政的縣市,無論是連任抑是新手,攏以差大碼的票數嬴tio̍h繼續執政,宜蘭縣林聰賢以十五萬對九萬得tio̍h連任、得票率63.9%;雲林縣新手李進勇接蘇治芬的手,以二十三萬票對十七萬票、得票率56.9%當選縣長;嘉義縣連任的張花冠以十九萬票對十萬票、得票率63%;台南市連任的賴清德以七十一萬票對二十六萬票、得票率72.9%破紀錄;高雄市連任的陳菊以九十九萬票對四十五萬票、得票率68.1%;屏東縣新手潘孟安接曹啟鴻的手,以三十萬票對十八萬票,得票率62.9%。會tàng看出綠色執政有得tio̍h人民的信任kah支持。   今年台灣九合一大選,中國國民黨輸kah chiah呢悽慘。奇怪,chit遍那會無聽tio̍h馬英九無罵講,攏是阿扁總統害in ē。
 
< Prev   Next >