首頁 arrow 綠色短評 arrow M̄好hō͘人民無歡喜!

M̄好hō͘人民無歡喜! PDF 列印 E-mail
發表者 李南衡   
2014/12/08, Monday
Chit遍台北市長選舉選到尾聲,中國國民黨提名的候選人連勝文陷入苦戰的時,有講一句話:「我後面hiah-ê台北市長選舉想kah傷簡單!」In想講:台北市選民結構是死釘釘的,支持藍色中國國民黨對支持綠色民進黨的比率是五十五比四十五,見若中國國民黨初選拚嬴、hông提名作市長候選人的,倒lehtiâu。致使連勝文佇黨內初選的時拚生拚死mā beh拚嬴丁守中,無疑誤大選選落去才知苦!連勝文kah後壁hit陣人作夢無想講世間萬項事攏有可能會改變,台北市選民結構準講是父母生成的、是有可能會改變。Chit遍會引起大改變,大環境的原因是中國國民黨政府中央執政太差,拚經濟GDP每年有影都有增加,干單好tio̍h大企業家,mài講一般人民薪水倒退lu轉十五年前的水準,連大企業的員工無得tio̍h啥利益,政府chhōa頭油電大起價、日常生活用品tòe teh有起無落;最近烏心食品烏心油害全台灣的人連食都無法度安心,中國國民黨政府kohchiah-ê作惡作毒的大企業家上的好朋友,甚至是in的門神,致使中央政府完全無法度提出好的對策,連一種油會食得都講出來,͘人民無歡喜、失望、受氣,人民當然chhōe中國國民黨提名的縣市長、議員候選人算數,用選票kā in教示一下。連勝文選輸的家己的原因,一言難盡,另日才講。 選前幾工,高雄市民進黨的市議員候選人洪平朗、新北市中國國民黨的市議員候選人陳明義,因為選舉廣告hông拆除,當面kah清潔隊員起衝突。選舉結果一南一北、一個民進黨一個中國國民黨,兩個攏落選,特別是身為中國國民黨中常委的陳明義差十五票落選,hông感覺真無彩mā誠m̄值。無分南北無分黨籍,chit兩位犯tio̍h仝款的錯誤:In m̄知影清潔隊員的工課是kā無路用的糞埽清掉,兩個tio̍h按呢hông清掉。佇網路頂面,有人套用台北市長競選期間的一句流行語:「M̄好hō͘連勝文無歡喜!」kā改作「M̄好hō͘清潔隊員無歡喜!」   咱beh請chit遍當選的縣市長m̄好歡喜你chit遍的勝利、傷過chhèng,請恁tī任期中時時會記得:M̄好hō͘人民無歡喜!仝款的道理,任何縣市無hit號永久無變、藍比綠khah大、抑是綠比藍khah大的道理。只有一種永久無變的道理是:M̄好hō͘人民無歡喜!因為民主政治上好的一點,是任何公職人員攏有任期,時間一下到,人民有絕對的權利kah力量,會tàng kā hō͘人民無歡喜的個人抑是政黨,準作無路用的糞埽清掉,一遍清無了,後遍會清一下koh khah清氣,kā in掃入烏暗的深坑,免十年,人民會kā hit-ê人抑是hit-ê政黨完全放bē記得!   所以,咱tio̍h大聲喝講:選舉萬歲!
 
< 前一個   下一個 >