首頁 arrow 綠色短評 arrow 白賊九仔及in彼黨e5!

白賊九仔及in彼黨e5! PDF Print E-mail
Thursday, 13 November 2008
        十一月初三,中國海協會會長陳雲林來台灣彼工,佇機場內底,佇天橋頂頭,過兩工,佇台北街頭,一再發生警察搶人民夯e5國旗,上嚴重e5彼遍是旗槁hou7警察折斷、國旗hou7警察揉揉作一丸。楊蕙如夯國旗佇台北市中山北路hou7警察搶到手tioh8傷。但是十一月初六,中華民國總統馬英九佇記者會講:夯國旗be7有問題,夯其他e5旗仔ma7無意見,但一定愛合法,be7使超過和平合法e5界線。咱叫伊「白賊九仔」一點仔都無枉屈伊,伊無意見e5是有幾個人佇中山北路頂面夯中華人民共和國國旗無代誌,夯中華民國國旗e5hou7警察搶去。行政院長劉兆玄頂禮拜佇立法院講,伊be7反對民眾夯國旗迎接陳雲林。

        一下看真濟人夯國旗hou7警察搶去沒收去,初四佇立法院hou7民進黨立委陳亭妃質詢時,反口供講:佇法定範圍內會使,佇路中央抑是警戒區就be7使!陳立委罵伊烏白講,連警政署答覆伊e5質疑都講m7知啥物警戒區,你行政院煞亂講!咱講in彼黨e5,是講連原本台聯黨e5陸委會主委賴幸媛,倚tioh8白賊九仔ma7仝款變會講白賊,伊敢有影攏無看tioh8警察搶國旗e5新聞報導?賴主委竟然敢講白賊:伊無反對民眾夯國旗歡迎陳雲林。咱khahbe7e5是,伊倚過去白賊九仔彼旁猶無兩百工,講白賊就講到chiah滑溜、面攏be7紅。

  十一月初四暗,中國國民黨榮譽主席連戰佇國賓飯店內底宴請陳雲林,離國賓飯店差不多有五十公尺e5「上揚唱片行」當teh放一塊唱片「台灣之歌」,忽然間,一位警官chhoa7一陣警察衝入去唱片行叫店主關掉音樂,禁止播送。引起群眾不滿大細聲,一陣警察硬ka7e5鐵門giu2落來。彼位警官第二工接受電視訪問e5時,咱才知影伊是北投分局長李漢卿,伊講:因為有人反映「上揚唱片行」音樂放傷大聲,所以伊才去勸店家放khah細聲。唱片行才ka7音樂關掉,店門ma7是唱片行家己關起來e5。真奇怪!好好一位分局長警官,那會佇白賊九仔就任無二百工,就hou7伊染tioh8hou7tou7 tioh8,變到hiah gau5講白賊!唱片行是m7是放傷大聲,是環保局e5代誌,警官那會烏卒仔食過河?何況電視新聞逐個看到足清楚,是in一大陣警察硬ka7鐵門giu2落來。第二工環保局有去量音量講無大到取締e5程度,而且「上揚唱片行」第二工請人來修理已經完全變形e5鐵門。若是家己關鐵門那有可能關到hiah粗魯?

  咱chit陣才知影白賊會傳染,m7但白賊九仔所講e5,連白賊九仔in彼黨e5人所講e5 ma7仝款,你若ka7信,你一定會神經錯亂。按呢beh按怎?聽了微微仔笑一下就好ah,至少日子會khah好過、khah be7氣死!
 
< Prev   Next >