首頁 arrow 綠色短評 arrow 馬英九是帶衰人大王!

馬英九是帶衰人大王! PDF 列印 E-mail
發表者 李南衡   
2014/12/15, Monday
十二月初十,中國國民黨召開馬英九總統辭掉黨主席以後的第一遍中常會,通過備查九合一選舉輔選工作檢討報告,列出六大敗選原因,其中第四點「首都選戰影響溢出去其他縣市」,暗示代表中國國民黨拚台北市長的連勝文選情愈拚愈ân,煞帶衰其他地區。講台北市長選戰成作所有媒體kah網路平台的焦點的時陣,連勝文kah伊的對手柯文哲團隊的表現,逐工都hông報導真濟,͘pòng大報導、放大檢視,͘中國國民黨佇台北市陷入苦戰,「拍破藍綠」的想法傳kah足遠,少年人雖然m̄-bat家鄉的候選人,mā tòa tio̍h台北市選戰的印象轉去故鄉投票,真濟在地的選民也透過媒體播送台北市的選戰來判斷支持藍抑是綠,「害本黨其他縣市選情連帶受tio̍h影響。用按呢來暗指連勝文帶衰其他縣市。」 連勝文會選輸當然有伊個人kah in競選團隊的缺失因素,中國國民黨所指責的「藍綠對削」,敢m̄是中國國民黨一向佇全台灣上愛用的老àu步,一旦藍綠拚生死,一寡深藍的選民自然會拚拚出來,無管是目屎含leh血含leh抑是恨含leh,出來投票選hō͘中國國民黨提名的候選人。Chit遍佇台北市舞bē振動主要是拄tio̍h柯文哲,伊ùi頭到尾強調「拍破藍綠」,無論中國國民黨按怎kā抹「綠」,伊就是強調跳脫藍綠對立,講伊是「白的」-公民力量。若是怪連勝文帶衰別的縣市實在過頭沈重,無應該。   Tī九合一全台選舉期間,咱攏有看tio̍h各地方的中國國民黨候選人偌呢悲哀,Mài講真少人敢佇看板頂面kā伊的像kah馬英九黨主席的像排作夥,大部分的中國國民黨候選人攏m̄敢表明伊是中國國民黨提名的候選人。佇嘉義有人佇中國國民黨提名市長候選人陳以真看板邊仔,chhāi一塊印有大大的中國國民黨黨徽的看板,寫講「選hō͘陳以真就是支持馬英九」,害陳以真氣kah beh死,因為逐個攏知,若hō͘馬英九磕tio̍h,穩死無活。所以十一月二二馬英九專工拚去嘉義市beh kā陳以真助選,陳以真驚kah走去bih,無疑誤馬英九十一月二五硬beh牽陳以真的手喝當選。可憐的陳以真因為hō͘帶衰人大王馬英九牽一下手,嬴嬴kiáu poa̍h kah輸去。彰化縣中國國民黨提名的縣長候選人林滄敏原本勢面誠好,因為帶衰人大王馬英九拚勢去彰化輔選、加上民進黨主席蔡英文拚去彰化十七擺,最後民進黨的魏明谷大嬴林滄敏十萬票。馬英九拚去台中市拚去桃園市,伊去愈濟遍的所在,中國國民黨提名的候選人輸愈thiám.。   講連勝文kā人帶衰無啥道理,佇伊頭前猶有帶衰人二王郭台銘,伊去kâng助選開選舉支票的攏落選。連勝文無資格搶馬英九chit位帶衰人大王的光彩!
 
< 前一個   下一個 >