首頁 arrow 綠色短評 arrow 烏的無可能嬴過白的!

烏的無可能嬴過白的! PDF Print E-mail
Written by 李南衡   
Friday, 19 December 2014
Chit遍台灣九合一選舉,台北市甚至全台灣,中國國民黨會輸kah chiah呢土,上大的原因是中國國民黨一直迷信,台北市kah真濟所在攏是「藍比綠khah大」,所以若直直拍「藍綠對削」,深藍的選民無管是血含leh、目屎含leh、恨含leh、毒含leh,攏會出來選,中國國民黨tio̍h穩嬴輸。In知藍綠選民是死釘釘的,隨時會tòe客觀條件起變化。若無,二十年前逐個講舊高雄市是藍的天下,1998年民進黨的謝長廷苦戰拚嬴tio̍h市長,2006年高雄市改作院轄市了後,陳菊是險險差一點to̍h落選,干單嬴中國國民黨提名的黃俊英1,114niā-niā2010年改作大高雄市長選舉,陳菊the̍h tio̍h 821,089票、得票率52.8%,啥人想會到chit遍陳菊競選連任,the̍h tio̍h全國上懸的993,300票、得票率68.09%大贏競選對手楊秋興45647票、30.89%。借問一下,高雄市算是藍khah大抑是綠khah大?任何人迷信一種,攏穩死無活。 舊年(2013)為tio̍h洪仲丘枉死案, 公民1985行動聯盟徛出來,七月二十早起九點發動「公民教育召集」,組成「白衫軍」佇國防部門口集合抗議遊行,有三萬人參加,提出「還仲丘公道,hō͘家屬真相」、「嚴懲違法失職人員」、「確保軍中人權、暢通申訴管道」等三大訴求,國防部看in phú-phú-ah,干單講「痛定思痛,徹底改革」。In無滿意,八月初四洪仲丘告別式的前一暗,八月初三舉辦「萬人送仲丘」、「八月雪運動」,突破二十五萬人。Hit暗,除了佇立法院bat替洪仲丘講話的立委hông邀請上台講話以外,所有各色的政治人物攏乖乖坐佇台仔腳,無任何政黨動員,mā無任何色彩的旗仔,是一遍白色力量的展現!續落去今年三月十八「日頭花」學運,mā是強調日頭光。因為日頭光內底啥物色攏包含在內,各色的光線合作夥tio̍h變作白色。   Chit遍台北市長候選人柯文哲強調白色,就是續接舊年白衫軍kah今年三一八「日頭花」學運,白色是日頭光的色,m̄是in講的「超越藍綠」,應該講包含藍綠柑仔任何色,就是自然光線的色。無常識的中國國民黨強beh拍藍綠對削,無奈拄tio̍h加真高段的柯文哲,親像日頭光按呢接納所有的色變作白色,有一寡戇人干單知影所有的色料lām作夥會變作「烏的」,所以中國國民黨kah連勝文競選團隊,ùi MG149一直到涉嫌中國器官買賣、竊聽疑案、活摘器官,甚至官二代、皇民攏罵罵出來,用各種色料beh kā柯文哲抹作變烏的。   Chit遍台北市長的選舉,hō͘咱學tio̍h一項,人造的各種色料lām作夥會變作「烏的」,各種色的光lām作夥親像日頭光是白的。烏的無可能嬴過白的!
 
< Prev   Next >