首頁 arrow 綠色短評 arrow 中國koh teh練啥siáu話!

中國koh teh練啥siáu話! PDF 列印 E-mail
發表者 李南衡   
2014/12/27, Saturday
十二月十八,美國Obama總統根據《2014年闡明台灣關係法kah海軍艦艇移轉法案》,正式批准賣四隻佩利(Perry)級飛彈巡防艦͘台灣,上難得的是chit-ê法案佇眾議院無一票反對的情形下通過的。雖然chit四隻軍艦攏是一九八0年代落水服役的,艦齡有三十外年ah,一隻拄拄退役、三隻mā beh退役,但是若是beh來替換早前美國買的、艦齡超過五十年的諾克斯級巡防艦,台灣是足歡喜。不過,台灣海軍編好的預算干單有買兩隻的錢niā-niā,當然tio̍h koh追加預算,一隻巡防艦差不多tio̍h美金一千萬。Che那像新加坡嚴格規定計程車駛七年一定tio̍h換新的,干單駛七年的舊車,賣去馬來西亞、印尼等國家作計程車猶koh足好用咧! 台灣真久tio̍h向美國要求買巡防艦,但是一直攏無成。Chit遍美國會chiah呢大pān一下手beh賣咱四隻,kah十一月二八,中國國民黨佇九合一選舉大輸有關係,美國認為此後台灣kah中國的關係會漸漸冷淡,台灣的處境mā會愈來愈危險,根據《台灣關係法》,美國有保護台灣安全的義務。   Bat擔任過「美國在台協會」理事主席、目前是華府智庫“Brookings”研究院東北亞研究中心主任卜睿哲講,chit件軍售案得tio̍h證明,「至少tī Obama總統任內,美國決心kah台灣建立良好關係,同時mā關切台灣的安全。」伊講,佩利級飛彈巡防艦「ia̍h m̄是啥物先進的戰艦,不過是用來替換已經超過壽限的舊艦艇。」伊講,美國kah中國的軍事交流誠無簡單才得tio̍h進展,應該珍惜。「我希望中國會tàng kā chit件『軍售案』,當作相當例行的軍售。」 十二月十九,中國國防部隨時強烈反應,新聞發言人耿雁生講,美國總統簽署通過了美國國會授權賣四隻佩利級飛彈巡防艦hō͘台灣,chit種行徑是「粗暴干涉中國內政,嚴重損害中國主權kah安全利益。中國堅決反對美國賣武器hō͘台灣,堅定捍衛國家主權、安全kah領土完整。」   笑死人,中國國家主權kah台灣有啥關係?中國的安全kah台灣買防衛性的武器有啥關係?中華人民共和國連一秒鐘mā m̄ bat管過台灣,中國領土有完整無完整kah台灣有啥關係?咱若kā in的話,「中國」chit兩字改作「台灣」,來向中國大聲提出抗議講:中國chit種行徑是「粗暴干涉台灣內政,嚴重損害台灣主權kah安全利益。台灣堅決贊成美國賣武器hō͘台灣,堅定捍衛台灣國家主權、安全kah領土完整。」敢m̄是顚倒比中國的抗議加足有理氣?   按呢,咱beh問,中國koh teh練啥siáu話!
 
< 前一個   下一個 >