首頁 arrow 綠色短評 arrow 拆拆拆,拚勢拆!

拆拆拆,拚勢拆! PDF Print E-mail
Written by 李南衡   
Monday, 05 January 2015
十二月二五台北市長柯文哲上任,二四點鐘內命令拆除忠孝西路頂的「公車專用道」。十二月二八拆清氣路鋪平。伊講,「Che m̄-nā是兌現選前的政見,koh khah重要是,我beh向台北市民作一個宣示,從今以後,政府會聽民意、政府是為人民服務的,而且會用上好的效率完成工作。」伊講市府施政的原則真簡單:「人民需要的,做͘人民;人民無愛的緊拆掉!」雖然因為地下有水管破漏,致使路面挖掉重鋪,工程有小可延遲,柯市長有施工同仁說謝勉勵。 新竹市光華二街有一棟第八、九、十樓違建的大樓,十二月十九透早發生火災,兩個細漢查某囝仔不幸燒死。林智堅就任市長的第二工,隨時拆掉違建,逐個攏喝讚!問題是新竹市政府列管的違建有7,897件,干單一條金山街tio̍h有兩百五十棟、將近四千戶違建套房,市府所編列拆違建預算兩百外萬,預算不足、人力有限,照chit號進度tio̍h拆一百三十二年。立法院tio̍h趕緊通過一個法案,縣市政府依法拆除違建的費用,完全由厝主負擔。照現此時的法律,拆違建的錢由全民納稅來替違建的人出錢,那有理咧?   十二月二八,台北市南港區興中路一棟厝頂加起的違建發生火警,有一個厝腳燒死。柯文哲市長去現場視察了無講半句話,十二月三十召開市政會議,決定上網公布226戶違建名單、攏是已經成案koh有舉發,而且攏是有牽涉tio̍h公共安全的。伊有考慮tio̍h舊曆過年,訂出今年三月二十以前家己處理。到時若無法度改善的tio̍h直接拆。因為無希望koh有人按呢燒死,請市議員mài來關說,來講mā無效。柯市長有考慮tio̍h tòa佇厝尾頂違建的人大部分是弱勢者,伊會公布台北市政府社會局救援電話,來協助續落去按怎處置等配套措施。   台中市長林佳龍上任後去視察BRT行控中心,發現行控中心問題真濟,大罵八分鐘。BRT藍線已經開四十外億,末來五線tio̍h koh開三百億。Beh繼續起落去抑是beh拆掉,已經責成副市長林陵三、交通局長王義川等人組專案小姐,一個月內提出BRT體檢結果,邀請專家、學者參詳,三個月提出解決方案。   交通部講,台中市若是拆掉重建已經起好的BRT,交通部無koh重複補助。交通部mā kā台北市長柯文哲放調講,相關公共運輸項目事後有囥teh閒抑是拆掉的情形發生(是指台北市拆掉公車專用道),交通部「不排除追回該項補助款」。交通部無向起起無用的馬英九追回補助款、抑無向郝龍斌追回chit期間補助款的利息錢,那會使顚倒beh kā拆掉妨礙交通的公車專用道的柯市長討錢咧?   Chit款的政府,明年總統大選的時逐家作夥拚勢來kā拆掉!
 
< Prev   Next >