首頁 arrow 綠色短評 arrow 咱tio̍h重視受刑人的醫療人權!

咱tio̍h重視受刑人的醫療人權! PDF 列印 E-mail
發表者 李南衡   
2015/01/09, Friday
2015年一月初五下晡三點半,關六年koh四十工的阿扁前總統出監,轉去in厝裡「保外就醫」。為ti̍ioh阿扁前總統會tàng「保外就醫」抑,已經舞幾ah,阿扁民間醫療小組一再提出阿扁前總統因為腦的病變,引起大舌、手會chhoah、嚴重siàm尿、失智等病症,已經是「無藥thang救」的程度,專業的醫師無人敢保證阿扁前總統的病情有可能會有明顯的改善,除非「奇蹟」出現!阿扁民間醫療小組一再提出報告,馬政府猶原無behin。「保外就醫」是政府的責任、並是政府對受刑人的施恩大德。受刑人有重病顚倒萬般刁難,m̄ hō͘受刑人得tio̍h應得的醫療照顧,是侵犯受刑人的醫療人權kah違反人道的代誌!法務部kah法學博士馬英九那像攏知影《監獄行刑法》第五十八條有規定:「受刑人若有tài tio̍h病,是監內無法度為伊作適當醫治的,tio̍h參考實際情形,報請監督機關許可保外醫治、抑是移送病監抑是病院。」 法務部所成立的「阿扁擴大醫療鑑定小組」十五位醫療成員,tī 2014年十二月二九達成初步共識,決定建議hō͘阿扁前總統「保外就醫,居家療養。」十二月三十台中榮總kā鑑定報告送到台中監獄,三十一下晡六點,法務部矯正署宣布,台中監獄公文因為高速公路塞車,五點五十六分才送到位,所以阿扁保外就醫案tio̍h延到一月初五年假放了才會審議。害原本想講新曆過年暗會tàng轉去 kah老母某子團圓的阿扁前總統,koh一擺大失望。法務部是thiau工teh凌遲人,今仔日是電子時代,用電子公文傳送三分鐘tio̍h有夠,若是一定tio̍h送紙本公文才會使得,那會m̄知過年連續假期高速公路會塞車?那會m̄知坐「高鐵」ùi台中到台北一點鐘niā-niā。按呢咱tio̍h知影法務部偌呢無重視受刑人的生命kah醫療人權。法務部那像無kā重病的受刑人舞kah死bē爽的款!   2012年十月初四,民進黨立委管碧玲質詢法務部,ùi矯正署所提供的資料,管碧玲立委發現2006年到2011年六年中,保外就醫的受刑人917人有505人tī保外就醫期間死亡,也就是有55.1%過身去,平均兩個tio̍h有一個死亡無koh倒轉去坐監。保外就醫十工內死亡的有114人、一個月內死亡的有197人、六十工內死亡的有263人,保外就醫變作「保送太平間」!管立委講,法務部有責任kā健康koh轉去坐監的比例提懸,kā受刑人保外就醫後的死亡率降低。意思是講法務部khah有誠意一絲仔,mài拖到人beh死 ah才放人轉去「保外就醫」。   2012年阿扁民間醫療小組建議法務部放阿扁前總統保外就醫的時,馬英九總統講:保外就醫tio̍h是釋放。你看伊偌呢無人權的觀念、無人道的想法!
 
< 前一個   下一個 >