首頁 arrow 綠色短評 arrow 司法按呢,看你beh按怎?

司法按呢,看你beh按怎? PDF Print E-mail
Friday, 14 November 2008
        林太太生美koh少年款,有兩個囝仔teh讀國民學校,無熟似e5人一定m7知影伊已經三十歲ah。早前警察來查戶口會使入來厝內坐。有一工,警察戶口查了m7走,一直阿佬林太太生得美。林太太一再拜託警察出去,警察攏teN3無聽tioh8。林太太最後氣起來講:你若koh m7出去,我beh報警察哦!無想tioh8警察豬哥面夯起來,笑到嘻嘻叫講:我就是警察!有啥代誌ka7我講就好。保護人民e5警察按呢,林太太煞m7beh按怎,目屎直直流,be7曉講半句話。

馬英九總統就任到今都猶未兩百工,國民黨就藉tioh8追查前總統阿扁e5國務機要費涉嫌貪瀆,掠前總統府出納陳鎮慧、阿扁總統妻舅吳景茂、吳淑珍夫人特別助理蔡銘哲以外,續落去十月十五掠前內政部長余政憲、二七掠前竹科管理局長李界木、二九掠嘉義縣長陳明文、三十一掠前國安局秘書長、前行政院副院長邱義仁、十一月初四掠雲林縣長蘇治芬、初九掠前總統府副秘書長馬永成,引起外國包括前美國在台協會理事主席白樂崎、美國傳統基金會學者譚慎格等二十外位學者e5關心。In認為檢察官所採取e5法律程序有嚴重缺失,有幾位猶未起訴就覊押禁見,違反人身保護及正當法律程序、公義及法治。檢察官辦公室真明顯將相關不利被告e5消息透露ho7媒體,chit種「透過媒體辦案」e5方式,違反司法程序e5基本標準。Inin m7愛看tioh8台灣辛苦拼來e5民主陷入chite5困境,而且台灣e5國際形象ma7會受重嚴重傷害,台灣應該向前邁進,無應該倒退lu轉去戒嚴烏暗時代e5不公及不義。

馬英九上任che半年來司法所辦e5攏是綠e5無藍e5,連ka7阿扁前總統國務機要費案起訴e5檢察官陳瑞仁都會煩惱講,檢察系統應該避免「辦案群組化」,干taN辦某一色e5人。

針對阿扁前總統hong收押、銬手銬chit件代誌,十一月十二,美國在台協會台北辦事處(AIT)處長楊甦棣表示,台灣司法問題伊無beh評論,不過伊講:向望這件代誌會得透明、公平、公正處理,按呢會加強全球對台灣民主發展e5信心。尾仔伊加一句話講:相信台灣及美國e5法律仝款,一個人猶未判罪以前,攏ma7假定伊是一個無罪e5人。聰明e5台灣人你敢聽無?

阿扁前總統以及蘇治芬縣長一陣人,未起訴未判刑就先銬手銬、收押起來,就是beh侮辱in e5人格。等到法官判in無罪,in e5人格已經死gen7-gen7 ah

  人講司法是社會正義最後一道防線。問題是:若是司法凌遲你、蹧躂你,你除了目屎直直流以外,你beh按怎?

 
< Prev   Next >