首頁 arrow 綠色短評 arrow 國稅局執法mā khah差不多一絲仔!

國稅局執法mā khah差不多一絲仔! PDF Print E-mail
Written by 李南衡   
Monday, 19 January 2015
一月十二,台南市民進黨前議員王定宇佇伊的面冊頂面講,台北市長柯文哲的父母,chit兩工遭受tio̍h國稅局追查,當初借錢͘柯文哲買厝的借條,甚至hông請去新竹國稅局說明。Che攏是因為台北市長選舉期間,有人懷疑柯文哲當年那有錢買現此時價值七千萬的厝咧?其實小可有頭殼的人想知,兩翁某攏作醫生二十外年,那會無才調買一間四、五千萬的厝。柯文哲hông攻擊MG149有歪哥的嫌疑的時,伊公布所有的數目。競選對手講柯文哲買厝父母贊助一千買,有報繳「贈與稅」抑無?若無就是逃稅!柯文哲in某陳佩琪公佈in兜十幾年來的繳稅單據、kah銀行簿仔出出入入的數目,內底有兩條十三萬幾的支出就是寄͘伊的大家官,表明in大家官有借in一千萬鬥相添買厝,兩年有寄錢͘伊的大家官算是利息錢。因為柯文哲beh競選台北市長欠用錢,父母叫伊che兩年免寄錢。Ho-o͘!掠tio̍h ah,借錢敢有寫借條?新竹市國稅局就是behchit件代誌。新聞報導了,逐家攏罵國稅局傷過欺負人,選舉煞了猶koh theh清算柯文哲!財政部北區國稅局表示,因為接tio̍h民眾檢舉,才會照規定發出書面通知受稽查人來說明,並是針對性的查稅。 騙三歲囝仔?咱講一個上簡單的例,娶新娘請人客攏mā有收賀禮紅包,若一切攏照法來行,是m̄是會使講有收入tio̍h應該納稅?若準有人去檢舉某某人佇某某大飯店娶新婦請人客,收的紅包超過幾十萬,趕緊去掠!借問一下,國稅局會去boh?國稅局查稅員若敢去,我保證伊會hông呸嘴瀾趕出去;若準有人去檢舉某某人佇某某殯儀館辦喪事,收的白包香奠超過幾十萬,國稅人員若敢去掠,無hông摃出去我輸你。Che kah柯文哲父母所講的,「父母借錢hō͘子女那有人寫借條」仝款,國稅局人員應該知影,法律規定只不過是幫助社會安定的一小部分而已,一個社會安定真正的基礎,是人情義理kah善良風俗習慣。   法律規定是死的,制訂法律規定的人是活的,執法的人mā是活的,頭殼應該mā是活的才tio̍h。法律規定是為人設的,佇死的法律規定頂面作出活的判斷,是執法者的智慧。《中庸》chit本冊內底有一句話,孔子公講:「道不遠人,人之為道而遠人,不可以為道。」意思是講:真理道理bē使離開人性傷遠,人若為tio̍h beh實現真理道理,煞離開人性傷遠,hit-ê就bē使算是真理道理!」 國稅局執法當然tio̍h認真,但是,若執法過頭kah違反人情義理、善良風俗習慣,in所執hit-ê法 tio̍h是有問題。   咱beh苦勸國稅局人員,執法mā khah差不多一絲仔!
 
< Prev   Next >