首頁 arrow 綠色短評 arrow 立法院敢是中國國民黨開的?

立法院敢是中國國民黨開的? PDF 列印 E-mail
發表者 李南衡   
2015/01/23, Friday
二十年前,有一位中國國民黨秘書長,kā in的黨代表講:「法院是咱執政黨的。」確實͘真濟台灣人想講:有影to̍h-tio̍h。到即陣,猶koh有人按呢想。致使有司法人員秉公辦案,會引起中國國民黨立委的不滿,beh kā in教示一下。 一月二十,朝野立委當tehe拚勢協商總預算,中國國民黨立委呂學樟提案凍結台南、屏東地檢署的預算。民進黨立委林淑芬相當不滿,罵講中國國民黨因為台南地檢署查頂新案,懷恨在心,才會chhōe機會修理台南地檢署,罵呂學樟無法無天,公義天良何在?呂立委反擊講,九合一選舉期間,台南kah屏東地檢署受tio̍h政治力介入傷明顯,民進黨作賊喝掠賊!Hō͘咱驚一tiô的是呂學樟立委不打自招,原來伊報復的是另外別的兩條代誌,那像應該kā呂學樟立委會失禮。   原來呂學樟立委講的兩條代誌是按呢,舊年底七合一大選競選期間的十一月二四,屏東地檢署偵辦影射縣長候選人潘孟安的黑函「潘安再世」文宣,再度指揮警調搜索中國國民黨屏東縣黨部,而且帶縣黨部主委張雅屏kah兩名組長轉去偵訊了後,以有勾串證人抑是共犯之虞,聲押獲准。早前tio̍h有羈押中國國民黨屏東市黨部主任傅建雄。若是心內一直想講「法院是中國國民黨開的」的人,當然會對屏東地檢署真受氣,無kā教示一下那會使得?   另外一條,是2014年十二月二五,台南市議長選舉,台南市新科市議員五十七名,民進黨二九名、中國國民黨十六名、其他十三名,結果是中國國民黨的李全教二九票當選議長,原本穩當選的民進黨前議長賴美惠二六票,當然是民進黨議員有人走票。十二月三十一,民進黨中央評議委員會開除五名走票的民進黨市議員黨籍,民進黨懷疑李全教有買票嫌疑,提出當選無效之訴,台南地檢署有分案調查、mā去扣留投票箱。另外,tī選舉期間,台南市議員候選人李全教的競選總幹事黃澄清、執行長葉枝成、柱仔腳李麗華等人涉嫌賄選,十二月底台南地檢署對李全教提出當選無效之訴,今年一月初五,李麗華里長向檢方坦承,講李全教有先提hō͘伊四萬至四十萬,以一票五千發hō͘六十位小柱仔腳。   本屆立法委員,雖然中國國民黨一黨獨大,113席立委佔超過半數的62席,但是立法院猶原是全民的立法院,bē使橫霸霸、想講立法院是中國國民黨開的。人民目睭金金看,若真正傷無款,會親像蔡正元立委按呢hông罷免。一月二三,呂學樟立委bē堪得hông恥笑,緊撤銷hit-ê足好笑的提案。但是,伊死鴨仔硬嘴pe,講未來beh kā南檢kah屏檢的檢察官移送監察院調查。   咱ǹg望從今以後,mài koh有立委想講,立法院是中國國民黨開的!
 
< 前一個   下一個 >