首頁 arrow 綠色短評 arrow 拜託mài koh假ah lah!

拜託mài koh假ah lah! PDF Print E-mail
Written by 李南衡   
Friday, 30 January 2015
台灣公共汽車kah捷運車頂的「博愛座」,滇濟人阿佬、特別是外國來的觀光客,in足欣賞車頂雖然人客真濟,逐個猶原堅持徛咧、͘「博愛座」空咧。我相信in干單看有說明圖案,看無圖案下面的一排中文字:「你若是老大人、大腹肚有身的人、身軀無方便的人、抑是有抱囝仔的人,請m̄-thang佔用chit-ê座位。」你可能battio̍h身軀勇健、歲數無老的人坐佇「博愛座」,大部分攏是teh睏,一路目睭攏無thih開、那像睏kah足落眠咧,其實是假睏,足假ê 台灣欠真濟,上無欠的就是「假」!佇大路十字路口抑是公車牌仔腳,攏有畫紅sûn,意思是「不准停車」。真奇怪,不管時佇真濟有畫紅sûn的路口抑是公車停靠站的所在,都有人停車。In若是色盲,根本無可能考tio̍h駕駛執照,原來in攏是假的色盲。電視報導十一月初八至十二月初七的台中市新社花海節,三十五公頃的花海內面遊客挨挨陣陣,明明佇花園邊有徛牌仔寫講:「禁止進入」,猶原有男女朋友、大人chhōa囝仔走入去內底翕相、踐踏花欉。In敢有影無讀冊?假的lah,臨時假作m̄-bat字。   最新的醫術美容會tàng kā一個普普的查某人變作天仙美女,目睫毛長koh虯、眼睭變重巡、一支鼻挺--挺、闊嘴變櫻桃小嘴、平坦坦的胸坎puh出兩座懸山、腳尻斗變翹翹、肥油抽了了,聽講che叫作雕塑,súi kah連家己mā bē認得,那會按呢?Che那像馬英九總統講的“long stay”其實「攏是假的!」   你若是錢傷濟想beh去銀行開一個戶頭寄錢,你想講提身分證、印仔kah錢去辦手續tio̍h會使,無疑誤銀行員真親切kā你講,真歹勢,你tio̍h準備雙證件!伊講m̄-nā銀行,連去買一支手機仔mā-tio̍h雙證件。你問銀行員,身分證是政府發的身分證明,是按怎bē-tàng證明chit-ê人是我本人?Chit-ê規定是啥人定的?是政府。豈有此理,政府是按怎bē-tàng相信家己發hō͘人民的身分證,tio̍h koh提另外一個證件來證明身分證咧?銀行員應講,有可能是有人用假的身分證開戶。若是chit-ê理由是真的,koh-khah亂來!有一工政府若發現第二個證件mā有人造假的,是m̄是tio̍h koh規定辦任何手續tio̍h需要三證件?四證件五證件?有一工發現假鈔,是m̄是tio̍h提證件來證明政府發行的銀票是真的?一個政府公開宣布伊所發hō͘人民的身分證,tio̍h用第二證件來證明chit張身分證是真的,借問一下,chit-ê政府beh叫咱人民tio̍h提啥物來證明chit-ê政府m̄是假的? Che也假,he也假,假kah實在hō͘人愈想愈siān,愈想愈氣!   拜託,mài koh假ah lah!
 
< Prev   Next >