首頁 arrow 綠色短評 arrow 中國國民黨chit遍敢是安全過關?

中國國民黨chit遍敢是安全過關? PDF 列印 E-mail
發表者 李南衡   
2015/02/09, Monday
2014年十一月二九,全台灣九合一選舉結果,包括苗栗縣第二選區的立法委員徐耀昌當選苗栗縣長、台中市第六選區的立法委員林佳龍當選台中市長、南投縣第二選區的立法委員林明溱當選南投縣長、彰化縣第四選區的立法委員魏明谷當選彰化縣長、屏東縣第三選區的立法委員潘孟安當選屏東縣長,所空出來的立法委員的缺tio̍h補選,雖然任期才一年niā-niā,但是無論是候選人抑是in所屬的政黨,攏拚全力落去選。對民進黨主席蔡英文來講,希望藉舊年十一月二九大嬴的勢會tàng加嬴一席,對新上任的中國國民黨主席朱立倫來講,若會tàng猶原保持兩席、無輸tio̍h是全台灣九合一大選的止血。 二月初七,chit五個選區的立法委員補選,出大日頭koh無特別寒,真可惜投票率真低,差不多四成niā-niā,比永年仔立法委員選舉的投票率七成外差真濟。初七下晡選煞,差不多七點外tio̍h知影輸嬴。補選的結果是,民進黨原本的三席立法委員猶原保持三席,中國國民黨原本的兩席無輸去仝款兩席。表面上看兩黨那像無輸無嬴,其實若看in的得票率,tio̍h會tàng看出藍綠支持者的消長變化。屏東縣民進黨的莊瑞雄大嬴中國國民黨的廖婉如兩萬外票,那像嬴真濟,事實上伊的前任也就是拄當選屏東縣長的潘孟安頂遍得票率66%真懸、莊瑞雄拚得票率加1%變作67% tio̍h真無簡單;當選的彰化縣民進黨陳素月得票率59%,比伊的前任也就是拄當選彰化縣長魏明谷的50%增加9%;當選的台中市民進黨黃國書得票率57%,比伊的前任也就是拄當選台中市長林佳龍的51%增加6%;選輸的苗栗縣民進黨吳宜臻得票率41%,比頂遍落選的民進黨候選人增加13%,值得咱kā阿佬拍pho̍k仔;選輸的南投縣民進黨湯火聖得票率47%,比頂遍落選的民進黨候選人增加2%。事實上是無論當選落選,民進黨提名的候選人得票率攏有增加,也就是講中國國民黨提名的候選人,無論是當選抑是落選,in的得票率攏減少。咱應該注意的是趨勢,chit-ê趨勢是m̄是會tàng延續落去,一直到明年的立法委員kah總統大選。   彰化縣中國國民黨提名拄卸任縣長的卓伯源選立委,選輸舊年十一月二九競選員林鎮長落選的縣議員陳素月,會tàng看出卓伯源縣長做了無hō͘縣民滿意,mā會tàng看出中國國民黨佇彰化無培養新人。台中市的立委候選人蕭家淇是台灣作了上久的副市長、升官去中央擔任內政部政務次長、行政院副秘書長,結果選輸台中市議員黃國書萬三票。是按怎中國國民黨無佇地方栽培的人才咧?   中國國民黨chit遍若無驚tio̍h,才是會hông驚!
 
< 前一個   下一個 >