首頁 arrow 綠色短評 arrow 亂亂來的罷免規定!

亂亂來的罷免規定! PDF 列印 E-mail
發表者 李南衡   
2015/02/17, Tuesday
台灣有《選舉罷免法》,敢有《罷免法》?無。既然號作《選舉罷免法》,選舉kah罷免應該平懸平大。但是咱的《選舉罷免法》卻大細目、無公平對待「罷免」,「選舉」當作千金小姐來寶惜、「罷免」準作心婦仔來凌遲,實在真無應該。「選舉」beh按怎分傳單、chhāi看板、插布旗仔、開宣傳車去街頭巷尾廣播,甚至佇各種新聞媒體作廣告,辦政見發表會,攏總會使;是按怎「罷免」chiah呢顧人怨,攏總使得?「使宣傳二月十四罷免蔡正元」,借問一下,「使宣傳二月十四罷免蔡正元」chit句話敢會使宣傳?二月十二,有一位「罷免蔡正元立委」的志工,佇街路裡提醒逐個「bē-tàng宣傳二月十四罷免蔡正元」,͘台北市警察局南港分局警員chhi̍h leh土腳銬手銬帶轉去派出所。Che敢是佇號作民主自由尊重人權的台灣所發生的?真正會hông傷心流目屎neh 有人認為台北市內湖南港地區2012年所選出來的立法委員蔡正元,chit民意代表所講所做,愈來愈無符合民意,雖然任期猶有一年,但是決定beh kā罷免。開始發動罷免,才深深感受「罷免」的戶碇有夠懸、懸kah無道理的程度。選縣市長、縣市議員、立法委員,甚至總統副總統,敢有規定投票率tio̍h超過幾成幾才有效?也就是講去投票的人tio̍h超過選舉人幾葩仙選舉才有算數?無。「選舉」無chit號規定。咱看今年二月初七,五個縣市立委補選,候選人有兩位甚至有的縣市有三位四候選位teh催票,投票率才三成外niā-niā,五縣市補選出來的新科立委有算數無?當然有算,逐個攏kā in恭喜。是按怎「罷免」規定投票率tio̍h超過五成以上才有hāⁿ過第一個戶碇咧?第二個戶碇講是「同意」票有超過投票數一半以上才有算數,chit點算是合理。咱看單一選區的民意代表、抑是縣市長的選舉,上濟票的人tio̍h宣布當選,有的候選人知影伊的票數已經超過半數,伊mā宣布當選。咱若kā「罷免」準作是「同意」kah「不同意」兩個teh拚,假使「同意」的票數若超過投票人數五成,應該tio̍h算「同意」通過。   二月十四,台北市內湖、南港地區舉辦「罷免蔡正元立法委員」投票,選了干單知影投票率無超過兩成半,tio̍h已經知影「罷免」無過,隨時會使宣布「罷免」無通過,根本to̍h m̄免開票、唱票、計票,才來宣布「罷免」無過過,敢m̄是足好笑?雖然有七萬八千外人來投票,贊成罷免的有96.76%,mā算作無意義!         咱除了拜託現任的立法委員修改「選舉罷免法」內底無合理的部分以外,上要緊的是明年初的立法委員選舉,台灣人目睭tio̍h 擘hō͘金,選出有kā民意囥佇心肝底的候選人,才是上根本的辦法,m̄免行到「罷免」chit-ê地步!
 
< 前一個   下一個 >