首頁 arrow 綠色短評 arrow 馬英九m̄驚笑破人的嘴!

馬英九m̄驚笑破人的嘴! PDF 列印 E-mail
發表者 李南衡   
2015/03/02, Monday
2013年九月初六,特偵組召開記者會,公布立法院長王金平、法務部前部長曾勇夫、高檢署前檢察長陳守煌等人涉嫌關說。兩工後,馬英九以中國國民黨主席身分召開記者會,譴責王金平「侵犯司法獨立」、「是台灣民主法治上恥辱的一工」,九月十一,中國國民黨召開考紀會開除王金平黨籍。伊若失去中國國民黨籍tio̍h無資格擔任該黨不分區立委,tio̍h bē-tàng koh作立法院長。王金平ùi外國轉來了後,向法院提起確認中國國民黨員資格的民事訴訟,法院裁准保留黨籍的假處分。中國國民黨不服向高等法院提出抗告,高等法院裁定駁回抗告案。koh提民事訴訟,地方法院一審判決王金平勝訴、保有黨籍。中國國民黨koh向高等法院上訴,koh判王金平嬴。舊年十月二二koh向最高法院上訴。十一月底「九合一大選」中國國民黨輸kah褪褲,馬英九為敗選負責辭掉黨主席。今年二月二五,新當選黨主席朱立倫宣布:「王院長確認是本黨同志無疑義。」

三點鐘後,hông煽嘴phóe的馬英九以個人身分發表一篇聲明,表示伊失望kah bē-tàng認同。伊講:「國民黨是有是非、講道義的開國政黨,面對大是大非的司法關說爭議,一定tio̍h捍衛黨的核心價值。無則無法度向百萬黨員交代。」

新正年頭馬英九講chit款hông聽了會吐的笑話,實在真無衛生。中國國民黨敢有影有是非?咱用bat作過兩任中國國民黨主席、兩任台北市長、第二任總統猶teh作、家己講有四十七年黨齡的中國國民黨員馬英九作例,伊作市長的時欠中央政府勞健保費m̄繳,台北市政府kah中央政府相告五年,2007年最高行政法院判台北市政府敗訴,繼任的郝龍斌市長替伊拭尻川、拭bē清氣,新任市長柯文哲講依法還清,指示市政府kā欠中央政府的勞健保費分五年還hō清,按呢m̄-chiah叫作「有是非」,馬英九那有面kah人講啥物「有是非」?

講「一定tio̍h捍衛黨的核心價值」,笑死人!中國國民黨猶有啥物「核心價值」?上好笑的是伊講「無則無法度向百萬黨員交代。」借問一下,百萬黨員是啥物時代的代誌?中國國民黨員大量流失,2000年正月初一,黨員重登記,若一年有繳五百元黨費,to̍h提兩百三十元向幸福人壽保險公司投保黨員平安險,若有意外會tàng領三十萬保險金,按呢誘拐黨員才有六十一萬人,無疑誤兩年後才chhun三十四萬外人。今年一月十七,中國國民黨舉行黨主席補選,56.34%也就是有十九萬六千八百三十位黨員去投票。若是beh講百萬黨員,不如講千萬黨員、kā死去骨頭好拍鼓hiah-ê老黨員攏算在內!

足奇怪,馬英九講chit款話,m̄驚笑破人的嘴!?
最後更新 ( 2015/03/03, Tuesday )
 
< 前一個   下一個 >