首頁 arrow 綠色短評 arrow 數字講m7 tioh8會按怎?

數字講m7 tioh8會按怎? PDF Print E-mail
Tuesday, 25 November 2008
        今年十月三十,民進黨民調中心所公佈e5民調,對馬英九總統e5滿意度跋到二二點六葩、不滿意度達到七十一點二葩。十一月二十,遠見雜誌公佈馬英九總統執政半年e5民意調查,滿意e5二九點八葩、不滿意五十八點二葩;對劉兆玄行政院長e5滿意度二五點四葩、不滿意e5五十八點三葩。數字若是會講話,是講:無論是藍e5抑是綠e5民調,che半年對馬政府e5滿意度攏是無夠三成,不滿意度攏是一半以上,就是講ui3五十八葩到七十一葩不等。

        會記得馬英九競選總統e5時陣開支票ma7有開一個數字:六三三。chit-e5數字是啥意思?馬英九當時是講若是hou7伊當選,台灣e5經濟成長率每年六葩、失業率三葩、國民所得每人美金三萬箍。馬總統上任百日,伊所開e5支票那像beh變作「芭樂票」,馬總統講,政府會全力實現、be7放棄、ma7無跳票,政府會虛心檢討。伊講,六三三e5目標可能tioh8延後到二0一六年才會完成。二0一六ma7是一個數字,chit e5數字講啥話?二0一六年是八年後e5代誌,若是伊四车後無法度連任總統,He是後任總統一任beh做煞hite5代誌,及伊ti7大代?照行政院主計處預估,今年經濟成長率無可能達到六葩。Che be7使烏白怪民進黨政府留落來e5「爛攤子」,因為數字會講話:去年第三季及第四季e5經濟成長率是六點八六葩及六點五葩,今年頭一季是六點二五葩。

  五二0馬政府上台e5前一工,台灣股票指數是九二九五點。真濟人記持誠好,猶會記得馬政府e5經濟部長尹啟銘ti7猶未就任e5五月初七講台灣股市會到兩萬點。所以真濟人等馬政府上台就馬上拼落去買股票。到七月初十,台灣股市就跋兩千兩百外點。民進黨立委賴清德叫尹部長tioh8公開道歉。伊部長講股市會到兩萬點是「講笑e5」。咱一直m7知影數字ma7會使提來講笑。

  十一月十七,有立委質問金管會主委陳樹,股市名嘴朱成志日前因為寫一篇〈為笨總統上一堂信用交易課〉e5文章,就要求停止朱成志萬寶投顧董事職務一個月,一個月內be7使佇媒體發表文章、ma7 be7使參加電視節目錄影,立委賴士葆質詢表示「金管會舞文字獄m7lah!」金管會主委陳樹講是因為朱成志佇文章內所採用e5數字及實際情形有真大e5出入,對市場產生不良影響。朱成志佇文章內底誤將台積電跋幅0點五二葩寫作五點二葩。

  數字會講話,講m7 tioh8會按怎?總統數字講m7 tioh8會使講he是八年後e5代誌,大官虎數字講m7 tioh8會使講he是「講笑e5」,老百姓數字講m7 tioh8,政府會使hou7你「be7講話」。啊?那會按呢!

  

註:第15行 「爛攤子」請用華語念

 
< Prev   Next >