首頁 arrow 綠色短評 arrow 全台灣的蔣介石銅像khioh khioh作一夥!

全台灣的蔣介石銅像khioh khioh作一夥! PDF Print E-mail
Written by 李南衡   
Monday, 09 March 2015
逐年的二二八紀念日,會使講是chhāi佇全台灣各所在蔣介石銅像的受難日。以今年來講,中正紀念堂內有憲兵teh顧,蔣介石銅像都猶hông khian雞卵,北一女校園內的蔣介石銅像的頭,hông蓋台北市的糞埽袋仔,有人蔣介石銅像帶腳鐐、有人蔣介石銅像穿麻衫作孝男,真濟所在的蔣介石銅像有͘人用油漆噴貓面,差不多攏有噴「殺人兇手」、「歷史罪人」、「殺人魔」等字眼,上殘忍的是,有人佇網路頂面pho͘一張蔣介石銅像hông斬頭的相片,警方趕緊去chhōe,才發現是chhāi佇基隆市獅球嶺一個小公園內的,事實上是三十外年前塑膠製的像已經破爛看得。今年全台灣聽講有三十六的所在有舞chit種「裝置藝術」,暴辱蔣介石銅像。 無管是數念、合意蔣介石抑是怨慼、懷恨蔣介石的人,相信攏會想講逐年按呢舞落去mā m̄是辦法,只有增加雙方的對立niā-niā,上好是會tàng kā全台灣的蔣介石銅像khioh khioh作一夥。有人會懷疑,全台灣bat作過的蔣介石銅像攏總有四萬五千外身,那有hiah大的所在thang下咧?無問題,咱講「銅像」,事實上真濟是塑膠的、有的是紅毛土的,一摃tio̍h歹去ah,無可能kā in遷徙,真正銅鑄的「銅像」才有可能收留,何況真正的銅像mā是有真濟是造型無súi的,會使資源回收熔熔掉作別種路用,發展經濟。   台南市長賴清德誠有智慧,伊參加今年二二八追思活動的時表示,未來台南市政府會成立專案小組,hō͘台南市內的蔣介石銅像全面退出校園,留hō͘學校一個清氣的學習空間,告別威權統治的蔭影。而且會kah桃園市政府討論,kā會堪得留落來的銅像移徙去桃園。桃園市政府隨時回應講「慈湖紀念雕像公園」願意接納收留chiah-ê蔣介石銅像。   1997年設立的「慈湖紀念雕塑公園」佔地四公頃,ùi全台灣各所在運送來chia的蔣介石銅像,已經超過兩百四十外身,成作全世界上特別的「一個人的雕像所成立的雕像公園」,每一座銅像攏有「履歷表」,註明in的來歷。有全身的、有半身的,有穿軍裝、有穿長衫tha̍h馬掛的、有穿中山服的,有徛teh、有坐teh、有騎馬的,有夯枴仔的、有phāiⁿ軍刀的。出在尊敬伊的人去參觀,聽講來台灣旅遊的中國人真愛去參觀蔣介石雕塑公園,是m̄是尊敬伊,咱to̍h m̄知。   全台灣的蔣介石銅像khioh khioh作一夥,才m̄免逐年二二八tio̍h hō͘人創治、裝siáu、凌辱一遍。而且日時參觀的人客走了後,暗時,兩三百身蔣介石,會使相招來泡茶,mā khah bē無伴。按呢敢m̄是真好?
 
< Prev   Next >