首頁 arrow 綠色短評 arrow 筆比劍koh khah有力!?

筆比劍koh khah有力!? PDF 列印 E-mail
發表者 李南衡   
2015/03/20, Friday
十九世紀英國一位作家巫呂瓦‧立東(Bulwer-Lytton) 佇伊的劇本內底有一句話講:「筆比劍koh khah有力。」一百七十外年來直直傳、傳到今仔日,煞變作全世界的一句名言,真濟人相信有影是按呢。 1968年三月初七,台灣政治評論家柏楊四十九歲生日hit工,hō͘台灣警備總部掠去,依叛亂罪判刑十二年。1972年香港一本政論雜誌《南北極》封面用一張漫畫,畫柏楊手夯一枝筆誠勇的姿勢,無疑誤hō͘人ùi腳脊phiaⁿ tū一枝劍,標題寫講:「筆比劍koh khah有力!」害我看kah目箍攏澹去。1975年因為蔣介石死去,台灣所有的受刑人減刑三分之一,柏楊關八年了,1977提早出獄。   現代人,「筆」會使講是寫佇報紙雜誌的文章、寫佇網路頂面的意見,佇電台、電視頂面發表的言論,佇演講台頂所發表的見解,也就是憲法規定人民應有的一種權利:「言論自由」。現代的「劍」mā是百百種,烏白兩道攏有,ùi執政者濫糝用的公權力、包括受行政權影響變了質的司法,kā你夯去判刑、坐監、銃殺,包括ùi財團、宗教團體、民間團體、抑是有夠力個人來的施壓,包括真正烏道所夯的刀kah銃,hō͘你斷腳斷手甚至一命嗚呼。事實上,佇真正自由民主的國家,mā無影tio̍h一定是「筆比劍koh khah有力」,何況是佇台灣,若看to̍h顚倒反,「劍比筆koh khah有力」現象的時,千萬m̄-thang tio̍h驚。   《壹電視》ti週間拜一至拜五暗時八點至十點播出,由彭文正、李晶玉翁某主持的〈正晶限時批〉,主持人kah來賓,m̄-nā有時會用滾笑的方式講一寡真相、有時mā會正khau倒削kah誠súi氣,才會吸引真濟觀眾準時收看chit-ê輕鬆趣味的節目,來瞭解嚴肅的政治經濟社會時事,節目最後用一張「正晶限時批」作結尾。像講舊年八月高雄氣爆不幸事件、十月頂新烏心油事件、今年二月台北市南港內湖區罷免立委蔡正元,每一項都會tī兩點鐘內hō͘觀眾一個完整的瞭解。今年二月底因為台北市長柯文哲講一句:慈濟用大把錢買保護區用地「beh改作開發,奇怪ē」惹起釋昭慧罵柯P是凌辱慈濟.伊會冷眼靜待「善惡必報」的昭昭天理,煞引起三、四禮拜各種媒體熱烈討論,ùi內湖保護區的開發到慈濟四界買保護區來開發,到慈濟的錢按怎無專款專用,到美國慈濟投資軍火商、製造枯葉劑公司等的邪惡基金。一工彭文正有聽tio̍h慈濟對電視公司有施壓的傳言,真受氣,決定辭掉chit-ê in翁某主持兩百幾工的電視節目「正晶限時批」。 今仔日,咱看tio̍h彭文正李晶玉翁某,兩人手夯筆,hō͘人ùi腳脊phiaⁿ tū一枝劍,同時mā看tio̍h台灣大學、蔡正元立委teh kā in射箭。看tio̍h真m̄甘!
 
< 前一個   下一個 >