首頁 arrow 綠色短評 arrow 咱會tàng ùi李光耀學tio̍h啥物?

咱會tàng ùi李光耀學tio̍h啥物? PDF 列印 E-mail
發表者 李南衡   
2015/03/30, Monday
三月二三,新加坡前總理李光耀過身去,伊領導新加坡三十年確實是一個人物,咱應該會tàng ùi伊學tio̍h一寡物件。 李光耀領導的新加坡建立一個hō͘人民相信政府令出必行、m̄是講假的,所以咱會tàng看tio̍h一個清氣有秩序的新加坡,無論是禁止隨便phùi痰涎、烏白擲菸屎、chhín彩擲糞埽、甚至食樹奶糖,無論犯tio̍h tó一項攏tio̍h重罰差不多新台幣兩萬元.。M̄是像咱台灣講啥物「立法從嚴,執法從寛」的siáu話。   李光耀領導的政府無貪污,「透明國際」評分佇世界上無歪哥的國家排第五名。新加坡政府若懷疑tó一個公務員有來路不明的錢財,一定徹查。有一位李光耀指定接班的副總理,hông查出來chhōa一個姑娘仔去馬來西亞雲頂高原(大kiáu場)渡假,政府重點是查伊那有錢?嚴辦結果hit位副總理落台、前途烏有、連退休金mā攏總無去,甚至無論去啥物大公司chhōe頭路,政府mā出面干涉kah hō͘伊「走投無路」,全國的公務員攏teh看,看啥人敢貪污敢假siáu!   人民有厝thang住。目前有八成差不多三百萬人住佇政府起的「租屋」,租期九十九年。收入懸低租金無仝,月收入新台幣兩萬以下租兩房、月租差不多千外元;月收入新台幣兩萬至三萬五租兩房,月租差不多新台幣四千五。新加坡的租屋是社區式的起造,起好hit工租戶tio̍h會使搬入去住、生活完全無問題,因為無論是水、電、gá-suh、下水道、學校、郵局、市場、大賣場、公園、戲院,甚至有幾路的公車駛到hia。徹底解決中低收入人民住的問題。   箝制自由。無論報紙、雜誌抑是電台、電視,你干單會tàng有一種聲音,新聞自由政府管kah足嚴。學術自由上出名的是硬kā民間有志出錢興辦的「南洋大學」關掉,阮東海大學第二任校長吳德耀先生退任了,應聘佇新加坡大學政治系教冊,後來受南洋大學董事會聘請去擔任校長,伊去了kah李光耀拚死拚死,無法度,mā是hō͘關掉。莫怪有人講佇新加坡若恬恬tio̍h會tàng平安過日無代誌。想起戒嚴時代咱台灣人拚自由大聲喝:阮無愛作「飼料雞」。   李光耀兩年前出一本《李光耀觀天下》,伊講:「台灣的前途m̄是根據台灣人民的意願決定,是由台灣kah中國力量對比的現實,以及美國是m̄是會進行干預來決定。美國bē為tio̍h台灣的獨立kah中國交戰,台灣一旦宣布獨立,中國tio̍h會以武力犯台。」伊koh講:「台灣kah大陸重新統一是時間問題,任何國家都無法度阻擋。」李光耀完全忽視台灣人追求民主自由的意願kah意志,所以咱tio̍h選一位會顧台灣的總統,全民協力顧台灣,用事實證明咱有ùi李光耀學tio̍h物件。
 
< 前一個   下一個 >