首頁 arrow 綠色短評 arrow 人生m̄是干單ong-ong-ong

人生m̄是干單ong-ong-ong PDF 列印 E-mail
發表者 李南衡   
2015/04/02, Thursday
舊年台北市長競選期間,有記者真好奇問市長候選人柯:你每一遍開會出來,嘴裡攏會直直唸,你到底teh唸啥物?柯P應講:我唸ong-ong-ong。按呢是啥意思?柯P講:開會煞,tio親像蜜蜂ong-ong-ong逐個作夥去做工。Che會tàng hō咱看出,柯P做工課真認真。

---------------------------------------------------------------------

講tio̍h「真」,是柯P hō͘市民上合意的一點,因為逐個已經看「作假」的政治人物看kah誠siān ah。

像講對手攻擊伊佇台大病醫院的時所設的“MG149”帳戶有問題,伊就kā“MG149”所有的數攏公布佇競選總部,有趣味的人會tàng去看去查;有人攻擊伊的財產,伊就公布in厝裡一二十年來的收支、包括繳稅的稅單。有人攻擊伊那有錢買厝?真可憐,兩翁某攏作醫生一二十年真正無才調買厝,tio̍h kā in老父借一千萬。隨時有人攻擊伊借錢那會使無納利息?實在真哭枵!父子借錢tio̍h koh納利息?柯P公布伊每年攏有滙錢hō͘ in老父利息。國稅局隨時出動問柯爸爸有收入那會無繳所得稅?罸!幾千萬幾億幾十億漏稅m̄去查,偏偏查幾千元幾萬元查kah chiah拚勢。

台北市民kah全台灣的人攏teh看!莫怪有人講hit遍柯P上有力的助選人,是hiah-ê烏白吵的人kah國稅局。

競選期間因為政治獻金目標八千萬已經到額,柯P隨時喝停無beh koh收;選舉了隨時公布競選所有的收入開銷明細。因為透明公開tio̍h是真,透明公開tio̍h bē亂來變鬼變怪。感謝柯P帶來「真」的風氣,一定會kā台灣作假的政壇洗khah清氣。   

因為柯P整頓台北市府過去的弊案,有人放調beh對伊不利、甚至講beh kā刣,記者問柯P有啥想法。伊真坦然講:我一向攏是「心存善念,勇往直前。」我心肝干單想beh kā tio̍h的代誌拚勢做hō͘好。人beh按怎對我,我mā無辦法。   

咱真慶幸選出柯P chit款市長,台北市政一定會向正面的方向大大進展。但是咱beh提醒柯P:歸工ong-ong-ong除了追求「真」kah「善」以外,猶一項mā真要緊,就是「美」。英國詩人Keats(khi-chuh)講:「Súi是永久的歡喜。」歸工ong-ong-ong親像柯P的人,無閒thang欣賞súi的事物,伊當然會失去真濟遍欣賞伊的細子天真的笑聲、失去真濟遍看伊細子對伊sai-nai古錐的面容,一首詩、一篇文、一首歌、一張圖、一場表演,ûn-ûn-á飲一杯咖啡抑是茶,聽山坑仔溪流的水聲、野鳥佇樹頂啼叫的歌聲,看山頂變化多端的雲霧、路邊野草拚勢teh開的一蕊小花、一片金黃等待收割的稻仔,攏hō͘咱得tio̍h欣賞的歡喜。   請柯P一定tio̍h瞭解而且體諒:Bē tàng要求每一個市府員工攏kah你仝款。因為真濟人攏知影:人生m̄是干單ong-ong-ong!

最後更新 ( 2015/04/10, Friday )
 
< 前一個   下一個 >