首頁 arrow 綠色短評 arrow 咱m7是愛Free China 是愛China Free!

咱m7是愛Free China 是愛China Free! PDF Print E-mail
Tuesday, 02 December 2008
        中國國民黨hou7中國共產黨掃出中國大陸、走路來台灣,中華民國政府就強佔台灣chit塊土地作「寄生仔」,佇戒嚴、白色恐怖下面掠關刣台灣人,koh四界去kang5講伊及中國共產黨hit個極權專制e5中國完全無仝,家己講是「自由中國」(Free China)

        害真濟外國人笑到鼻孔空殼,講台灣m7但無自由、亦m7是中國。Hit陣有一位中國國民黨e5老黨員雷震,及一陣讀冊人想講蔣介石是講真e5,有心beh ka7台灣拼作「自由中國」,in就用chit-e5名辦一本政論雜誌,希望台灣真正會變作自由中國,續落去in tioh8聯合外省人台灣人想beh組一個「中國民主黨」,惹起蔣介石及中國國民黨受氣,用「叛亂罪」ka7辦,關雷震十年烏牢、關掉「自由中國」雜誌,看你敢koh講自由抑m7敢!

  四十八年後台灣人koh theh chit兩字英語字起來講,總是已經順序顛倒、變作Chian Free,意思並m7是「中國自由」,是講產品內底完全無摻tioh8中國原料。像講有糖尿病e5人食物件往往會chhoe7包裝頂面有印sugar free e5食品,意思是講:內底完全無摻蔗糖,請安心使用。

  自從中國烏心產品遍掃全世界了後,真濟人看tioh8「中國製」(英文印made in China)e5產品,無管是食e穿e5e5bat出過代誌,實在會hou7人驚!中國人真奸巧,in就無印「中國」(China),改印工廠所在地e5地名、印英文字,hou7你完全m7heto2一國e5產品。咱台灣大賣場、超級市場攏有teh賣一種外國名牌牛奶粉,製造地慢慢仔讀才知影真夭壽,是中國東北「烏龍江」e5漢語拼音,外國人beh那會知影he是中國e5一個地名!ma7有真濟所在雖然m7是佇中國,不過in產品完全採用中國原料、抑是產品內底有摻tioh8中國原料,檢查結果ma7是烏心!按呢是beh按怎防咧?路尾,真濟外國政府為tioh8 hou7消費者安心,產品內底若完全無中國原料,會使印China Free

        咱台灣hou7中國山東都慶公司e5奶精舞一個險險仔khiau去,雖然因為按呢一個衛生署長煞落台煞尾,但是問題並無解決,因為台灣真濟製造商為tioh8貪俗使用中國原料,老實講若出代誌歸間公司ma7賠無夠。咱全台灣e5消費者,ma7完全m7beh按怎分別to2一項產品有摻tioh8中國原料。

  咱無可能期待馬政府會為台灣人民做chit項代誌,咱希望消費者基金會聯合台灣各種民間團體製作China Free(無摻中國原料)e5標仔送hou7台灣製造商來貼。台灣人若攏有心會tang3聯合起來,免靠馬政府,靠全民e5力量,咱就會tang3保護咱所有台灣人e5生命安全!

 
< Prev   Next >