首頁 arrow 綠色短評 arrow 台灣國軍軍官的素質會hông驚!

台灣國軍軍官的素質會hông驚! PDF Print E-mail
Written by 李南衡   
Friday, 10 April 2015
早前阮tòa庄腳有一坵菜園,園內有一欉ná-柭仔樹真gâu生,附近的小學生比阮khah早知影ná-柭仔已經成熟ahin會剥開竹籬笆偷入去挽。有一遍一個囝仔歹運͘我掠tio̍h,應該是國民學校一年仔的學生,堪得我大聲喝講:你偷入來第幾遍、第五遍抑是第六遍?伊趕緊用手指頭仔比四,相信我若問伊一遍抑是兩遍,伊的確會比一。

---------------------------------------------------------------------

藝人李蒨蓉佇伊的面冊頂面PO伊坐佇AH-64E「阿爸試」(Apache)攻擊直升機的駕駛座、頭戴「阿爸飼」攻擊直升機專用的頭盔,展伊有特權、有夠力會tàng坐起得chiah稀罕的直升機。講稀罕實在真稀罕,咱普通人干單會tàng徛遠遠欣賞,根本無可能隨便依近去,徛依翕相koh khah無可能。M̄是單干因為貴蔘蔘一架二十億,伊是一架足特別的攻擊直升機,會tàng倒退lu飛、會tàng斜斜飛懸飛低,會tàng隨意徙位hō͘敵人無簡單鎖定伊,伊是tank戰車的殺手,是目前世界一的攻擊直升機,全世界干單賣咱台灣,連日本韓國都無賣in。

  啥人會tàng tī三月二九 chhōa貴婦團入去陸軍航特部601旅參觀AH-64E「阿爸試」、翕相、坐起得駕駛艙、戴頭盔咧?原來是該部隊的飛行官勞乃成中校濫用特權、嚴重違反軍紀。有人煩惱「阿爸試」攻擊直升機的機密會洩漏去中國、有人擔心美國會受氣、有人氣講國軍軍紀敗壞散亂,一人煩惱一項。

  咱khah煩惱的是咱國軍軍官素質太差,m̄是驚in高深的現代軍事科技學無透、m̄是煩惱in無國家安全的觀念、m̄是擔心in對國家無夠忠誠,咱煩惱的是in的算術程度猶輸小學一年仔學生。四月初二代誌piak孔,四月初三陸軍司令部開記者會,講三月二九hit工有大人十三個、囝仔三個,攏總二十個人。咱按怎算mā是十六個人。致使有五個官長受處分。四月初七陸軍司令部講入去陸軍航特部601旅參觀有二十六個、其中有一個日本人,koh包括五個外勞;處罰名單變作十六個。幾千幾萬人入去營區那會算bē清楚?到底幾個人應該受處罰mā無定案,已經有四粒星、三十七蕊梅花舞害去ah,koh講猶有第三波處罰名單,,到底有幾波?m̄知攏總會落幾粒星落來、幾蕊梅花會lian去?講啥?勞乃成中校chit遍chhōa親朋好友入去參觀m̄是頭一遍,二月二十二伊有chhōa十人團入去參觀;進前的二月二十伊的頂司旅長簡聰淵chhōa四個人入去參觀。四月初八檢調講三月二九猶有一團,按呢算應該是幾遍?以前猶有幾個勞乃成kah簡聰淵?算無?抑是傷濟算bē清楚?上好的辦法是大聲喝講:十遍仰是九遍?相信in會應講:八遍。In的算術程度猶無法度kah小學一年仔學生比並,你講有悲哀無?

Last Updated ( Friday, 10 April 2015 )
 
< Prev   Next >