首頁 arrow 綠色短評 arrow 三億ùi叼來?走叼去?

三億ùi叼來?走叼去? PDF Print E-mail
Written by 李南衡   
Wednesday, 22 April 2015
舊年十一月二九台北市長選舉,今年一月十四,新科市長柯(kho)P接受電視訪問,講tio̍h政治獻金,伊感慨講:競選尾聲,伊想beh去拜訪一位科技界大老,拜託朋友安排,過幾工,朋友hit位科技界大老講伊長期支持中國國民黨,而且已經有the̍h三億͘對手ah,伊的態度改變、無方便見面。柯Pchit項過時的代誌,主要是伊一直想曉,競選的時若kâng the̍h三億,三億是小可錢,若是當選到底beh按怎回報人、beh按怎還chit-ê人情咧? 有新聞敏感的新聞工作者周玉蔻隨時去追問柯P,伊講的hit位科技界大老是m̄是郭台銘?柯P一下tio̍h應講是。有新聞來源,周玉蔻tio̍h kā準作新聞報出來。郭台銘以民事、刑事告周玉蔻要求賠償一千萬koh公開道歉。二月初二柯P接受電視專訪有講,the̍h三億hō͘人的是郭台銘,是聽民進黨立委柯建銘講的。因為郭台銘告周玉蔻,四月十三,柯P以證人身分去法院作證,所講的kah伊早前幾遍講的攏仝款。Hit中晝,柯建銘立委開記者會講,當初伊講郭台銘捐款三億是hō͘台北市政府的上海博覽會的台北館、m̄是捐hō͘台北市長候選人連勝文。記者問柯P按怎想?柯P應講我昨昏才頭一遍聽tio̍h。咱所瞭解的柯P是一位無彎無khiau、有話直講,直kah hông罵作「白目」的人,人khah會信伊講的話是真的。   問題來ah,三億若是2010年郭台銘捐hō͘台北市政府的,按呢,郭台銘到底捐偌濟hō͘連勝文咧?講攏無捐半錢恐驚無人愛信。台北市議員趕緊去查,2010年上海世博台北館檔案,並無一條三億的入數,三億走叼去?台北市前市長郝龍斌講,上海世博台北館是鴻海捐獻起的,完全無任何金錢入來台北市政府,到底起偌濟錢,台北市政府mā m̄知。隨時有人查出來,鴻海捐世博台北館了後無偌久,鴻海的郭台銘to̍h標tio̍h三創文化園區,chit中間有「對價關係」抑無?   頂世紀六十年代美國lop入去越戰期間,Pete Seeger(Phè-tī Siger)寫一首反戰的歌《Hiah-ê花走叼去》真濟人愛唱:「Hiah-ê花走叼去,已經真久ah,查某囝仔kā花一蕊一蕊挽起來,in tang時才會瞭解?Hiah-ê查某囝仔走叼去,已經真久ah,hiah-ê查某囝仔一個一個去chhōe少年家,in tang時才會瞭解?Hiah-ê少年家走叼去,已經真久ah,hiah-ê少年家一個一個去作兵,in tang時才會瞭解?Hiah-ê阿兵哥走叼去,已經真久ah,hiah-ê阿兵哥一個一個入去墓仔埔,in tang時才會瞭解?Hiah-ê墓仔埔走叼去,已經真久ah,hiah-ê墓仔埔一個一個開kah攏是花,in tang時才會瞭解?」一首歌to̍h講清楚,hiah-ê花ùi叼來,走叼去。   舞三個外月ah,咱猶無法度瞭解三億ùi叼來、走叼去。奇怪ē!
 
< Prev   Next >