首頁 arrow 綠色短評 arrow 台灣何mih苦加入「亞投行」咧?

台灣何mih苦加入「亞投行」咧? PDF Print E-mail
Written by 李南衡   
Monday, 27 April 2015
最近台灣為tio̍h加入「亞投行」舞kah頭眩目暗,舞歸晡舞kah m̄知意思,the̍h錢去中國份股東tio̍h koh hō͘中國洗面、洗kah一箍giàngiàn頭。立委問政府官員:咱加入「亞投行」beh創啥?對台灣有啥好處?Hông洗面猶原歡歡喜喜beh加入、台灣的面囥佇叼位?政府官員煞大嘴開開beh按怎應! 咱先來瞭解「亞投行」是啥物?伊是「亞洲基礎建設投資銀行」的縮寫。Chit-ê銀行的構想,是2013年十月中國國家主席習近平訪問東南亞的時所提出的,目的是「提供亞洲國家提升基礎建設、亞洲地區政府之間多邊開發的機構」,基礎建設包括鐵路、管路、電力、公路、港口、通信等等。舊年先kah亞洲二十外國簽署合作備忘錄了後,真濟國家有意向參加,今年三月十二英國正式申請加入了後,法國德國意大利等歐洲國家相續加入,到三月二七有三十八個會員國,美國日本並無參加。舊年中國tio̍h有kā咱台灣通知,今年三月三十一日申請截止前申請加入的國家,會tàng成作「創始成員國」,有資格參與創立章程的討論。Che就是為啥物馬英九總統所強調的「一開始無夯手,將來tio̍h無發言權。」是按怎一定ti̍ioh 拖到三月三十一日上尾工才拼去申請?歸年攏tèⁿ恬恬,屎chiⁿ佇尻川才beh開屎礐,按呢tio̍h koh一遍閃過立法院事先的監督kah同意。   台灣政府意向申請書應該向「亞投行」臨時秘書處提出,馬政府偏偏講是「雙管齊下」,另外koh向中國「國務院台灣事務辦公室」(簡稱「國台辦」)提出申請,馬英九明明是kā中國政府講:「老大ê,我細漢的來lo̍h!」莫怪幾工後,中國財政部副部長朱光耀講台灣m̄是一個主權經濟體,無法度成作「創始成員國」,人連一個正式公文mā免kā你回,出聲tio̍h kā你踢出門外。   中國the̍h美金五百億出來作美金一千億poa̍h大kiáu的莊官,台灣趕緊講beh the̍h二十二億去鬥相添,真不幸hō͘發起國的中國一個tio̍h kā你消毒去!連門都無法度入去!中國國民黨主席朱立倫kā馬英九總統提議:「至少tio̍h四百億才會tàng hông看出咱台灣的經濟實力,而且四百億對咱國mā m̄是足大的數額。」戇呆! 問題m̄是錢,是國家的名!   參加chit類的機構mā算是行向國際,若是開錢會tàng帶轉來商機、增加對國際市場的影響力、有機會參與各國的基礎建設,當然是好代誌。問題是咱以前出錢參加日本主導的「亞洲開發銀行」,有得過啥物好處?有啥物國際經貿體系的運作?有帶轉來過啥物商機?若無,咱猶未入去tio̍h 先hō͘中國洗面,台灣何mih苦加入「亞投行」咧?
 
< Prev   Next >