首頁 arrow 綠色短評 arrow 咱看馬英九總統目睭金金!

咱看馬英九總統目睭金金! PDF Print E-mail
Written by 李南衡   
Tuesday, 05 May 2015
新北市長、中國國民黨主席朱立倫決定五月初二beh去中國,初三參加「上海國共論壇」、初三下晡飛北京、初四早起佇人民大會堂kah中國國家主席、中國共產黨總書記習近平見面會談。四月二九,馬英九總統專工拼去陸委會視察,發表談話,beh hō͘逐個知影掌管兩岸事務的陸委會是伊管的,那像狗soān尿,宣示伊的勢力範圍。好笑以外,hông感覺小可悲哀的是,堂堂一個中華民國的總統,那會那像陷眠講啥物「九二共識」是「兩旁歡喜甘願的」咧! 咱攏知影,「九二共識」的意思是講1992年兩岸會談了的一個共識,共識的內容主要是「一個中國,各自表述」。事實上chit句話是2000年五月二十,民進黨新政府上台前的四月二八,當時中國國民黨舊政府的陸委會主委蘇起所發明的,一直到2008年五月二六中國國民黨的馬英九就任總統了後,台灣海基會才頭一遍出現chit-ê名詞;中國hit旁一直攏m̄知影有啥物「九二共識」,到2005年當時佇台灣在野的中國國民黨主席連戰訪問中國,才kah中國共產黨共同承諾beh推捒「九二共識」,chit-ê由蘇起發明、完全虛構出來的名詞,十三年後的2005年才頭一遍出現佇中國的官方文件頂面。   台灣的中國國民黨政府講「九二共識」,雖然是「講一個中國,但是是各自表述,in講一個中國是中華人民共和國,咱講一個中國是中華民國」;真失禮,中國方面連啥都無愛kah你「表述」,干單強調「一個中國」。   1992年香港會談當時的李登輝總統講根本都無啥物「九二共識」;當時的陸委會主委黃昆輝講那有啥物「九二共識」?當時擔任海基會董事長負責會談的辜振甫佇伊的回憶錄,佇香港會談雙方對「一個中國」的認知並無達成任何共識;當時擔任海基會秘書長的陳榮傑講,中國海協會有寫批hō͘海基會講:佇兩岸事務性商談中,無牽涉tio̍h「一個中國」的政治涵義,雙方對「一個中國」的認知無仝;企業家曹興誠講,中國國民黨一日到暗堅持一個指鹿作馬、無中生有的「九二共識」,是一種弱智的行為(弱智的意思是精神發展khah慢)。   1992年香港會談了後,當時擔任陸委會副主委的馬英九,佇《中央日報》公開發表聲明講九二年會談是「功虧一簣」(意思是講差一糞箕土煞無成功,真可惜!),伊講原因是「一中各表」雙方意見無交集,結論是「無共識」。   馬英九總統頂日講「九二共識」是「兩旁歡喜甘願的」,咱原本懷疑伊是「陷眠」,但是,若看伊早前家己講的話,咱確定馬英九總統是「目睭金金」。台灣人攏知影下面tio̍h接續落去講「人傷重」!
 
< Prev   Next >