首頁 arrow 綠色短評 arrow 朱立倫實在有夠紅!

朱立倫實在有夠紅! PDF Print E-mail
Written by 李南衡   
Monday, 11 May 2015
五月初二,新北市長、中國國民黨主席朱立倫去中國,初四早起佇人民大會堂kah中國國家主席、中國共產黨總書記習近平見面會談。真失禮,中國方面講che猶無夠「會談」的水準,只不過是「見面」niā-niā,明明是朱立倫洗面。見面了,習近平講,目前兩岸關係拄拄佇新的重要節點上,兩岸關係的路應該按怎行,是兩岸所有政黨kah所有社會各界的重大問題,關係tio̍h中華民族kah國家未來,關係tio̍h兩岸民眾福祉,需要逐個認真思考。兩個黨的頭人見面,習近平講「兩岸所有的政黨」,意思真明,我是干單kah你中國國民黨談,我會kah所有的政黨談。朱立倫當面聽tio̍h,心肝底敢tiāuChe雖然是逐個攏知影的代誌,你無需要當面對我按呢講!Koh kā朱立倫洗面,洗kah朱立倫一個面紅kih-kih。朱立倫轉來台灣的時講,驚人抺烏抺紅! 面紅一下仔tio̍h會褪,家己抺紅洗bē lut。朱立倫對習近平講,今仔日我kah(中國)國民黨代表團來到北京,1992年佇海基、海協真濟前輩逐個非常辛苦努力之下,雙方達成了兩岸同屬一中,但內涵、定義有所無仝的九二共識。佇chit-ê基礎頂面,雙方進行了真濟遍會談,kā原來兩岸之間對抗、甚至是真濟紛擾,轉化作和解、交流,chit款的歷史mā形成了兩岸交流共同的基礎。   內行人親像「美聯社」聽tio̍h朱立倫講「兩岸同屬一中」chit句話,tio̍h看出朱立倫kā家己抺kah紅phā-phā,所以報導講:(中國)國民黨「支持kah中國終極統一」,中國國民黨抗議,朱立倫要求美聯社撤稿。美聯社無愛插伊都真害ah,無疑誤煞引起koh khah濟外國媒體、親像英國的福斯新聞、衛報、澳洲人報、新加坡今日報、美國之音相爭按呢報。美聯社是按怎聽tio̍h朱立倫講「兩岸同屬一中」chit句話就斷定(中國)國民黨是「支持kah中國終極統一」咧?因為2005年三月十四中國公布實施的《反分裂國家法》第二條講kah足清楚:世界只有一個中國,大陸kah台灣同屬一個中國,中國的主權kah領土完整不容分割,維護國家主權kah領土完整是包括台灣同胞在內的全中國人民的共同義務。   五月初七,行政院陸委會主委夏立言佇國會殿堂承認,佇中華民國境內,確實無人講「兩岸同屬一中」chit-ê詞。歸日teh講彼號無中生有的「九二共識」的中國國民黨的頭人,佇台灣敢大細聲講:「九二共識」,後壁koh加講一句「一中各表」,當然,in去中國連表mā m̄敢表一聲,朱立倫竟然敢家己面抺紅紅照中國的話講「兩岸同屬一中」。   朱立倫那像炊熟的毛蟹紅tiu-tiu,那有需要人kā抹紅?
Last Updated ( Tuesday, 12 May 2015 )
 
< Prev   Next >