首頁 arrow 綠色短評 arrow 龍交龍,鳳交鳳!

龍交龍,鳳交鳳! PDF 列印 E-mail
2008/12/09, Tuesday
        十一月底,Dalai Lama第十四世講伊希望明年會tang3 koh來台灣訪問。對台灣來講,chit種人格者beh來台灣訪問,表示伊看咱台灣有起。Chit位熟似來客bat ti7一九九七年李登輝總統執政時代及二00一年阿扁總統執政時代,兩遍來台灣訪問,M7但分別及李登輝總統、阿扁總統會見,ma7有及當時擔任台北市長e5馬英九見面。

        當時e5馬市長ma7及人有講有笑、親hou3-hou3,那像是久年e5好朋友。事實上,會tang3chit位佇全世界受尊敬、battioh8 Nobel和平獎e5 Dalai Lama見面,對馬市長來講ma7是真有面子真光榮e5代誌。

  Mai3講競選總統期間馬英九所講e5話,就是五月二一總統就任e5第二工,伊佇國際記者會頂面ma7kah真清楚,講假使Dalai Lama若是以宗教領袖e5身分想beh來台灣訪問,「伊會非常歡迎」。續落去,七月接受《南德日報》訪問e5時,記者問馬英九總統,假使Dalai Lama若希望koh來台灣訪問,是m7是受tioh8歡迎?馬總統是m7是會及伊見面?馬英九總統答講,Dalai Lama bat以宗教領袖e5身分來台灣訪問兩遍,我ma7 bat及伊見面過。假使伊koh一遍以宗教領袖e5身分beh來台灣訪問,阮會歡迎伊。

  中國外交部發言人劉建超ti7十二月初二記者會頂面講,Dalai宣佈計劃明年訪問台灣chit項代誌,中國強調,台灣及西藏攏是中國領土不可分割e5一部分,中國反對Dalai以任何方式從事分裂祖國e5任何活動。伊講,Dalai訪問台灣,佇中國看起來,絕對是分裂行徑!

  十二月初四,馬英九總統趕緊佇外籍記者面前宣布講,伊認為「chitchit刻」Dalai Lama訪問台灣,時機無適宜。公開拒絕Dalai Lama明年來台灣訪問。照馬總統家己e5講法:「Dalai Lama bat以宗教領袖e5身分來台灣訪問兩遍。假如伊koh一遍以宗教領袖e5身分beh來台灣訪問,阮會歡迎伊。」Dalai Lama真有可能聽馬英九總統按呢講,才會講希望明年來台灣訪問。借問馬英九總統,Dalai Lama chit遍敢有講beh換別種身分來台灣訪問?若無,伊猶原是宗教領袖身分,那會忽然間變作「時間無適宜」咧?你講e5話猶有啥人會信咧?干單中國e5報紙阿佬講:「馬英九對Dalai Lama e5認識,已經遠遠超越一般人e5視野。」咱看tioh8 e5是馬英九講白賊及be7見笑,遠遠超越一般人。

  咱台灣俗語話講:龍交龍,鳳交鳳。全世界e5人攏teh看,馬英九m7交龍m7交鳳、beh交陳雲林,看馬英九所交e5,就知影馬英九是啥物貨色!
 
< 前一個   下一個 >