首頁 arrow 綠色短評 arrow 中國國民黨偌呢清廉,你敢知?

中國國民黨偌呢清廉,你敢知? PDF 列印 E-mail
發表者 李南衡   
2015/05/22, Friday

2008年總統大選的時,差不多每一個電視台攏放一個廣告:「你準備好ah抑未?」當時中國國民黨佇台灣島內執政的十六個縣市長,一個一個出來講:「阮準備好ah!」氣勢十足,替總統候選人馬英九掛保證、相當有說服力!

馬英九總統一任四年作了,真濟台灣人猶gông車車,那像食tio̍h迷魂藥,koh選hō͘馬英九連任了,才慢慢仔知苦,才那像眠夢精神、想講hit十六縣市長kah馬英九本人所講的「阮準備好ah!」到底是啥物準備好ah?原來hit陣in是講準備好beh歪哥ah!若無,執政十六縣市那會舞到今仔日chhun五個咧!   馬英九kah郝龍斌,咱另日才來分析。先講幾個hō͘你鼻芳,Ùi台灣頭的基隆市講起,1994年張通榮參選基隆市議長的時,因為瀆職、賄選,hông判有期徒刑七個月、2013年六月基隆天橋崩落去,張通榮市長幾遍講法攏無仝,2013年有人飲酒駛車koh拍人、張市長去關說大罵承辦的警員,hông依教唆公務員縱放罪判刑一年八個月。苗栗縣長劉政鴻任內上偉大的政績是kā已經結穗的稻仔開怪手lu-lu掉,koh強拆民宅,hō͘朱學恆佇網路頂面kā封作「十大惡人」,伊家己講是「苗栗理財王」,落任了後才發現伊所主政的苗栗縣政府負債新台幣六百四十八億,伊本人就任前負債五千兩百萬、兩任縣長作了攏還清,有怪無?2012年十一月,南投縣長李朝卿因為涉嫌南投風災修建工程the̍h紅包,而且查出2008年至2012年之間的一百二十外件發包工程kah採購攏有kâng the̍h紅包。佇kah馬英九、吳敦義關係密切的行政院秘書長林益世、台北市議員賴素如先後因為貪污遭受收押,網友講中國國民黨是「北素如、中朝卿、南益世,牽手污台灣。」有厲害無?彰化縣長卓伯源的小弟卓伯仲涉嫌彰化縣政府真濟項採購弊案,施壓縣政府承辦人員用樣品不符等理由刁難得標者,涉嫌利用縣府廠商匯錢去台北買厝,檢調以違反《貪污治罪條例》、《政府採購法》等罪偵辦,收押禁見。落台了,查出前縣長卓伯源翁某涉嫌洗錢,kā五千萬的資金流入親友的戶頭,主導開發案、違法徵收民地,卓伯源佇台中市三千萬的樓仔厝無申報財產,檢方以觸犯公務員財產申報不實罪列作被告。以外的縣市長一時講bē了,請期待另日繼續。   五月十八,台北市議員高嘉瑜質詢台北市長柯文哲,高中《公民與社會》2冊有一段文字講中國國民黨是一個「健全、民主、清廉的政黨」,請問市長有同意chit句話無?問三遍,柯市長起愛笑講:「Chit-ê教科書那會、那會?按呢寫傷Over(超過)lah!Che是教科書抑是宣傳品?」「健全、民主」慢且講,干單講中國國民黨「清廉」,tio̍h會hō͘全台灣九成以上的人笑kah跋跋倒!
 
< 前一個   下一個 >