首頁 arrow 綠色短評 arrow 匪諜tio̍h佇你的身邊!

匪諜tio̍h佇你的身邊! PDF 列印 E-mail
發表者 李南衡   
2015/06/08, Monday
現此時的台灣人,若有人koh講白色恐怖時代的一句口號「匪諜tio̍h佇你的身邊!」會hông感覺足好笑。事實上,並無好笑,因為現此時的台灣仝款是按呢:「匪諜tio̍h佇你的身邊!」 新聞報導,「公民教師行動聯盟」發起人、台東女中老師周威同,因為伊徛佇第一線反烏箱微調課綱。講伊的評論是「負面消息」,hō͘學校教官依照「校園安全事件」通報教育部列管。教官講見若有學校的名見報,tio̍h愛照「校安事件」通報教育部。因為周咸同老師五月二九有接受自由時報記者訪問,談論課綱微調政策,教官tio̍h照規定向教育部通報。雖然台東女中校長潘致強澄清講,六月初一伊有約見周老師,伊完全支持周老師徛佇公民教師的專業來表達應該講的話,伊決定撤銷通報,無teh考慮將來校長遴選問題;教育部次長陳德華表示,伊無清楚台東女中的通報情況,假使有通部,教育部mā bē對周威同老師有啥物處理。不過咱關心的是二十一世紀十五年代今仔日的台灣,是按怎佇校園內底猶有會hông驚hiâⁿ「匪諜」的烏影tio̍h佇你的身邊咧? 原本佇中國大陸實施軍訓教育hông罵kah臭頭,講是「軍國思想的教育」,中國國民黨政府走路來台灣第三年的1951年,決定佇台灣地區恢復學生的軍訓教育。翻轉年1952年十月三十一慶祝蔣介石總統生日,成立由蔣經國主持的「中國青年反共救國團」,kah國防部聯合主導教官遴選配置,1960年學生軍訓教官任用權才移hō͘教育部主導,正式納入教育體系。當時的教官佇中學kah大學,表面上是負責學生軍事訓練,事實上koh khah要緊的是「學生品行管理」、「思想政治教育」、「推展中國國民黨黨務」(拐騙、威脅學生入黨)。Ùi台東女中教官依照「校園安全事件」通報周威同老師去教育部列管,咱才知影教官m̄-nā管學生,連學校老師的言行舉止mā管到到,hō͘學生kah老師隨時感覺「匪諜tio̍h佇你的身邊」,驚kah phī-phī-chhoah,你講軍訓教官那會使無廢掉?   中國國民黨籍立法委員講教官若廢掉,校園的安全會發生問題。借問一下,全世界自由民主國家,有叼一國的叼一間中學抑是大學有軍訓教官?全世界的中學大學的安全敢攏出問題?敢有亂操操?騙人mā小可用一點仔頭殼咧! 2013年六月二七,立法院臨時會院會通過「高等中學教育法」,其中朝野黨團達成共識,做出「八年內教官回歸國防體系」的附帶決議,也就是講,2021年以前教官tio̍h全面退出高中職。意思是講,2021年以前,台灣的中學猶有2,583名、大學猶有1,000名「匪諜」烏影佇學生kah教職員的身邊!
 
< 前一個   下一個 >