首頁 arrow 綠色短評 arrow 免管中國國民黨總統候選人是啥人!

免管中國國民黨總統候選人是啥人! PDF 列印 E-mail
發表者 李南衡   
2015/06/16, Tuesday
中國國民黨chit幾個月推選啥人作總統候選人,歸個黨內初選過程那像三歲囝仔teh sńg「辦公家伙仔」,實在會hông hài頭。 馬英九總統chit七年外的執政土土土,中國國民黨執政品質已經保證了無及格ah,致使明年2016年總統大選煞無人敢出頭。立法院副院長洪秀柱看中國國民黨三十萬黨員無一個是查埔人,好膽跳出來黨內連署登記作候選人,伊ù頭itio̍h講伊是「抛磚引玉」,伊chit塊磚khian出來是beh引玉仔出來。引無啥物玉出來,伊煞感覺家己愈來愈sêng一塊玉,連邊仔看鬧熱的mā講伊是一塊玉!   文字工作者管仁健笑中國國民黨推翻滿清、建立中華民國,今仔日中華民國政府佇台灣,kah伊所推翻的滿清政府仝款仝款。滿州人統治中國靠八旗(kā軍政、生產、司法、宗教融作一體的軍事社會組織),上三旗由皇帝直接控制的,下五旗是由王公貴族控制。但是統治猶有欠腳手,用漢人來做官以漢治漢,但是無論你偌呢盡忠、有能力,做偌大的官,漢人原本tio̍h是奴隸,永遠無可能進入國家決策層。佇台灣的中華民國政府仝款,上三旗是蔣家嫡系的,老蔣的時代是黃埔系統,小蔣時代是赣南系統,以外的中國人攏算是下五旗,欠統治腳手就用台灣人,台灣人無論你偌呢盡忠、拍拼、做到偌大的官,台灣人原本tio̍h是奴隸。   王金平m̄知家己的身分,黨內初選已經hông恐嚇kah m̄敢去領表登記,算你目睭擘有金,放你逃生。無疑誤六月初七,向媒體透露講,若是黨來徵召伊,伊將「義不容辭」,若是中國國民黨徵召伊作中國國民黨的總統候選人,伊道義上bē使無擔當。聽tio̍h「義不容辭」,副總統吳敦義緊喝講:「我lah!我lah!」 啥物?奴隸身分的台灣人敢講beh代表中國國民黨出來選總統?Hō͘家己自認為是貴族統治者的外省人,聽了真受氣。馬上佇報紙寫一篇文章講:「王金平選總統,國民黨將亡ah!」想想一下,伊講chit句話mā無m̄-tio̍h。「王金平」chit三字the̍h掉,換任何人的名:「洪秀柱選總統」、「朱立倫選總統」、「吳敦義選總統」接落去攏仝款是「國民黨將亡ah!」既然按呢,王金平上好是立法院長乖乖作完,轉去故鄉作一個無事人,何mí苦奴隸假貴族、閹雞趁鳳飛咧!   為tio̍h beh抵制奴隸身分的台灣人王金平,已經有百外粒星的將軍徛佇洪秀柱後面,有一大堆已經消風去ah的外交官kah國安大官徛佇洪秀柱後面。洪秀柱若黨內提名通過,伊到底beh按怎拼總統大選chit局咧?伊若無過看啥人會出來咧?真濟人等teh beh看鬧熱,橫直中國國民黨派啥人出來選總統,結局攏仝款:「國民黨將亡ah!」無論笑劇抑是悲劇,啥人來搬攏一定真好看。
 
< 前一個   下一個 >