首頁 arrow 綠色短評 arrow 中國國民黨足愛亂亂滾笑!

中國國民黨足愛亂亂滾笑! PDF Print E-mail
Written by 李南衡   
Monday, 22 June 2015
六月十五,立法院副院長洪秀柱突破中國國民黨總統候選人初選,黨主席朱立倫kah秘書長李四川隨時拼去拜訪洪秀柱,承諾黨中央會全力輔選。事後洪秀柱對記者講,伊有向朱立倫主席提起「若chhōe無副主席、你來。」朱主席應講「Mài 滾笑。」堂堂一個今年一月才選出來的中國國民黨主席朱立倫,無論民調抑是黨內的聲望攏是上懸,伊一再拒絕出來選總統。「抛磚引玉」抛出來的一塊磚仔洪秀柱,知是假khong抑是戇,叫黨主席朱立倫作伊的副總統候選人,莫怪朱立倫會應講:「Mài 滾笑。」 其實,中國國民黨m̄是一個小可(khóa)愛滾笑的政黨。   有一百二十年歷史,家己講是一個民主政黨的中國國民黨,幾十年幾任中華民國總統干單兩任八年hō͘民進黨搶去作以外,攏是中國國民黨執政,借問一下,有tó一遍總統大選有經過黨內初選?無。中國國民黨黨內頭一遍有總統候選人初選,眾天王無一人敢去領表登記,路尾只有洪秀柱kah楊志良去登記黨內連署,洪秀柱講伊是「抛磚引玉」,楊志良黨內提名三萬份連署名額無過,chhun一個候選人,伊tio̍h是當然候選人。無,中國國民黨愛滾笑,講tio̍h照「制度」行。笑死人,中國國民黨根本m̄-bat有總統候選人黨內初選,beh那有黨內初選制度,臨時訂出一個「防磚條款」(防止磚仔出線的條款)講:若是一個人登記黨員提名連署通過,tio̍h作民調,若有超過30%,伊tio̍h通過、提名伊;若是兩人抑是兩人以上登記,tio̍h協調,協調成功tio̍h提名啥人,若是協調無成功tio̍h辦理初選。民調30%按怎算出來?自了m̄-bat有總統初選的中國國民黨,只好照立委初選制度來行。M̄-tio̍h,立委初選民調是有兩個抑是兩個以上的人teh拚m̄才需要初選民調,一個人出來選當然是提名伊,那有啥物民調咧?愛滾笑!好lah,照立委民調方式:支持度民調佔15%、對比式民調(tio̍h是伊kah民進黨總統候選人蔡英文比)佔85%,洪秀柱抗議按呢無合理。六月初五,中國國民黨秘書長李四川臨時改作50%對50%。Che koh一遍hō͘咱看出中國國民黨實在真愛滾笑。制度會使隨時改!六月十五,民調結果出爐,三間民調公司所作出來的民調結果平均起來是46.203%。三間對比式民調是43.68%、40.642%、40.613%,咱所講的「對比式」民調,是kah蔡英文比,三間民調公司有志一同,攏無公布40幾%的分母是偌濟?伊所對比的蔡英文是偌濟?中國國民chit-ê滾笑傷過頭。   咱beh hō͘中國國民黨主席朱立倫知影,貴黨若chiah呢愛亂亂滾笑,明年正月十六總統大選結果發表,恁tio̍h會笑bē出來!
 
< Prev   Next >