首頁 arrow 綠色短評 arrow Kā陳菊市長chhi̍h一個「讚」!

Kā陳菊市長chhi̍h一個「讚」! PDF Print E-mail
Written by 李南衡   
Thursday, 02 July 2015

六月二七暗八點半,佇新北市八仙樂園舉辦的「彩色phá-thì」活動,忽然間發生「塵粉爆炸事件」,因為彩色塵粉接觸tio̍h火源隨時發生爆炸,噴佇身軀頂面的彩色塵粉隨時to̍h火燒傷,致使有beh倚五百人tio̍h傷,有兩百九十一人傷勢嚴重佇加護病房救治中,到七月初二有兩位燒傷過頭嚴重的患者不幸已經過身去ahChit遍不幸事件的特色是所有的受傷者攏是二十歲前後的青年。

Ùi國外紅到國內的「彩色路跑」活動,2013年九月二八,第一個佇台北市大佳河濱公園舉辦,差不多有一萬五千外名民眾報名參加,全長五公里的路程中有規劃四個彩粉區,人歸個面攏噴tio̍h彩粉,有人用毛巾掩遮鼻目嘴,甚至有人戴防毒面具,真濟民眾hō͘塵粉cha̍k tio̍h。活動了,有「華人健康網」呼籲講:歸個活動場地干單看tio̍h iāⁿ-iāⁿ的各色塵粉,塵粉真幼,會進入人的支氣管kah肺部,而且有人的體質可能造成皮膚過敏。活動了,四個彩粉區攏累積真厚的塵粉,先用掃帚掃了再用清水沖洗入去基隆河,基隆河變作彩色河,看tio̍h會hông驚。主辦單位那像「爽」了tio̍h好,無管是m̄是會破壞環境污染溪河。   其實tī台北市舉行「彩色路跑」活動兩禮拜前的九月初十,「公共電視」佇新聞中有討論彩色路跑噴粉霧的問題,一位物理老師李化有警告講,chit種彩色塵粉一旦有接觸tio̍h一點點仔火屎,tio̍h有可能引發「塵粉爆炸」,而且殺傷力比一般gá-suh氣爆koh khah嚴重。當時mā有訪問業者呂忠吉,伊承認加減有一寡危險。可惜咱各級政府有關官員那像攏m̄知危險,才無去管制抑是預防災厄發生。   台北辦了仝年十一月二三去台中,佇「台中都會公園」舉辦彩色路跑,吸引一萬五千外人參加。新聞報導講:大受好評。   八仙樂園災難發生了,有人佇報紙阿老高雄市長陳菊是「先知」。事實上伊並m̄是啥物先知,伊只不過是一位盡心盡意盡力去kā市長做hō͘好的普通人。代誌的經過是按呢:2013年十二月十一,「彩色路跑」的主辦單位講,原本預定2014年正月十一高雄chit場「彩色路跑」,因為高雄市政府決定現場bē使噴粉,所以取消活動。當時陳菊市長反對的理由真簡單,第一,彩色路跑噴大量的番麥粉討債糧食。第二,會造成空氣污染,對身體無好。第三,清洗hiah濟彩色番麥粉入去水溝河川大海會造成環境污染。當時的環保局長今仔日的副市長陳金德講,事實上hit當時in mā m̄知「彩色塵粉」會引起爆炸的問題。   無管按怎,一個行政主管堅持m̄-tio̍h的代誌絕對bē使做,咱tio̍h kā陳菊市長chhi̍h一個「讚」!
 
< Prev   Next >