首頁 arrow 綠色短評 arrow 你敢知影「連胡會五項願景」是啥碗糕?

你敢知影「連胡會五項願景」是啥碗糕? PDF 列印 E-mail
發表者 李南衡   
2015/07/13, Monday
中國國民黨準總統候選人洪秀柱烏白放砲,一下仔講「一中同表」、一下仔講beh kah中國簽署「和平協定」、一下仔講「使講中華民國存在」,害中國國民黨高層phī-phī-chhoah,迫一寡beh選立委的人一個一個跳離直直beh沈落去chit隻中國國民黨大船。別項mài講,干單講一個準總統候選人公開講beh kah hit-ê兩千外粒飛彈向台灣的中國簽署「和平協定」,真濟人聽tio̍h腳尾to̍h冷起來。 講beh kah中國簽署「和平協定」,追求台灣海峽兩岸永久和平,有啥物m̄好?原來是歷史教咱講「和平協定」若簽落去,會害、穩死無活。1951年五月二三,中華人民共和國政府強迫西藏政府簽訂《關於和平解放西藏辦法的十七條協議》,簽了人民解放軍tio̍h隨時開入去武力佔領西藏。有人提醒講「和平協議」是國內法,若是國對國是「和平條約」。第二次世界大戰期間1941年蘇聯kah日本簽署《日蘇和平條約》,四1945年四月宣布終止,八月蘇聯出兵到中國東北拍日本關東軍。事實上,和平協議抑是和平條約攏無法度保證和平,簽啥物和平協約、和平條約mā攏會使隨時變面。   今年六月二九,中國國民黨準總統條選人洪秀柱辦公室講,希望「中國國民黨黨綱草案」會tàng清楚寫出「和平協定」,mài干單用「連胡五項願景」一句話hôe過去。中國國民黨表示目前「政綱草案」已經有兩岸和平的相關主張kah精神,洪秀柱的意見tio̍h照程序由政綱小組研議,才交hō͘全代會決議。目前的「政策綱領草案」,佇兩岸政策綱領部份已經有指出「延續『連胡五項願景』的精神,堅守中華民國憲法,鞏固九二共識,捍衛台灣對等尊嚴,維護台灣永久和平。」   咱應該瞭解「連胡五項願景」是啥碗糕?2004年總統大選反(péng)無過,在野的中國國民黨主席、純種的中國人連戰,2005年四月二六去中國,kah當時中國共產黨總書記胡錦濤談話的結論作出「連胡會五項願景」,包括:一,佇九二共識基礎上恢復兩岸談判;二,終止對敵狀態,達成和平協議;三,建立兩岸經濟合作機制;四,促進台灣國際參與;五,建立黨對黨定期溝通平台。   2008年五月二六,中國國民黨主席吳伯雄去北京kah當時的中國共產黨總書記胡錦濤談話,重點是重新執政的中國國民黨,beh落實「連胡會五項願景」kā納入中國國民黨政綱內底。   若是中國國民黨聲聲句句講beh發揮「連胡會五項願景」精神,按呢,中國國民黨準總統候選人洪秀柱大聲講黨綱tio̍h kā「連胡會五項願景」的第二項簽署「和平協定」寫入去「中國國民黨黨綱」有啥m̄-tio̍h?愛偷食koh驚人知!無品。
 
< 前一個   下一個 >