首頁 arrow 綠色短評 arrow 賊khah惡人的劉政鴻!

賊khah惡人的劉政鴻! PDF 列印 E-mail
發表者 李南衡   
2015/07/20, Monday

七月十一風颱天,苗栗縣長徐耀昌來台北向行政院求援,因為chit個月薪水六億、退休金六億、總共十二億發出來。砲轟前縣長劉政鴻「用到米甕斷半粒米」、「Chit孔舞了傷大孔!」徐縣長哀講:「苗栗縣政府負債累累,超過648億,每工利息tio̍h一百六十六萬、一年tio̍h六億。希望行政院會tàng舒困一百億來發薪水。行政院並無答應救急。無疑誤前縣長劉政鴻顚倒罵徐縣長「無能」、「那有縣長hiah呢好作的?」甚至罵講:「那有人縣長作七八個月ah,猶逐工teh喝散哀無錢!見笑代!若無能應該落台,換別人來作!」續落去煞教徐縣長:「高鐵特定區土地有一百億產值,會tàng the̍h去向銀行貸款,發薪水kah退休金!」徐縣長講hit塊土地,劉前縣長早早tio̍h the̍h去銀行貸款了ah

有人罵劉政鴻前縣長會舞kah chiah大孔,主要是伊愛封神:2011年慶祝建國一百年燈會開五億二、第二年國慶放煙火燒掉兩億九、起客家圓樓開億二萬、起英才書院開一億四千外萬、一條八公里的後龍溪起六座大橋。咱mā知影積少成多的道理,不過老實講,真正大條的是劉政鴻烏白開發,一個小小的苗栗縣就有超過2,400公頃的工業區kah科技園區,開一大把錢去徵收土地、整地,無人來投資,koh m̄願了錢賣掉,才會舞kah一孔烏lang-lang。   吳敦義副總統講苗栗縣負債六百外億,bē使完全怪劉政鴻前縣長。講了足tio̍h。第一,劉政鴻前縣長應該負責的是四百外億,因為有兩百億是前前縣長傅學鵬所留落來的。第二,應該怪人民選出來監督縣政府的苗栗縣議會,連續二十一年來審查縣政府提出的預算,連一角銀都m̄-bat刣過。咱干單the̍h 2010年來作例,歲入預算313億、歲出預算350億,欠37億,議會是按怎免刣一寡歲出預算、hō͘收支平衡咧?監督政府的議會那準無事人,che是m̄是叫作「財政烏洞共犯」?第三,應該怪行政院,行政院下面的財政部負責管理地方政府財政預算kah結算,是按怎tī劉政鴻前縣長執政(2005—2014)九年期間,每年歲出比歲入大hiah濟,攏無夠開,財政部m̄-nā無發現問題、提出糾正要求改進,顚倒tī 2011年至2013年度各縣市財政業務考評中,苗栗縣佇「公庫管理」部分連續三年得tio̍h甲等。Chit中間的2009至2012年吳敦義擔任行政院長,敢攏無責任?第四,應該怪監察院,監察院下面有審計部是監督預算執行、審核財務收支、審定決算。是無「審」、抑是「審假部」?苗栗縣政府長期違法失職,監察院敢免提出彈劾?第五,公營行庫是按怎烏白借錢hō͘伊,仝款情形民營銀行敢有可能借伊?   劉政鴻賊khah惡人!因為連吳敦義副總統mā講bē使完全怪伊。
 
< 前一個   下一個 >