首頁 arrow 綠色短評 arrow 咱看賴清德市長按怎節流

咱看賴清德市長按怎節流 PDF Print E-mail
Written by 李南衡   
Thursday, 30 July 2015
七月薪水kah退休金總共十二億發出來,苗栗縣長徐耀昌拚來台北向行政院求援。七月十四,行政院發言人孫立群講,苗栗縣應該向台南市kah宜蘭縣學習按怎節流。一個執政黨行政院的發言人教執政黨的苗栗縣,去向在野黨的台南市kah宜蘭市學看按怎節流,實在是真不得已、是真見笑的代誌。 咱簡單先講宜蘭縣,宜蘭縣長林聰賢認為無錢免假大扮,善用民間資源作夥辦活動、投資佇日後可能有收入的公共建設像講梅花湖停車場、一年收入五百萬;開銷方面,老人津貼訂有錢人無老人津貼的排富條款、推動線頂公文簽核機制,一年省330萬張白紙、亦就是一年半省一個台北101 hiah懸的白紙,省的碳粉猶無算。除了無koh借錢,第一任宜蘭縣長每年還四億外,四年還十七億。   台南市tī縣市合併時負債964億,台南市財政hông評選作「中重度昏迷插管區」-若無中央政府支援,重要政府機能無法度順利進行。賴清德講「以稅入編稅出」,有偌濟錢才來編列錢beh按怎照順序來用。Chit句話講khah簡單。伊第一個刣掉全台灣地方政府的惡例,市議員小型工程款,五十七位議員一年刣掉八億五千五百萬,所有的議員攏跳起來反對抗議;刣掉一個鄰長每個月二千元的交通費、一萬四千外個鄰長一刣一年就省掉三億五千萬。錢,伊用佇治水六十九億、路平經費十四億、改建造二七座橋、新路開十條。伊建置一個公開透明機制來回應議員的建議權,hō͘府會關係進入一個和諧理性的民主常軌。伊命令所有市內公共的水道頭攏tio̍h採用省水裝置,伊chhōe企業贊助百外台復康巴士,增加補助老人免費裝假嘴齒、免費注射肺炎鏈球菌疫苗,hō͘社會福利koh-khah完善。賴市長的原則是應該開tio̍h開、應該省tio̍h省。賴清德市長第一任四年還了127億債務,財政改善12.5%,五都的第一名。   舊年十一月底賴清德市長拚當選連任,伊的對手中國國民黨提名的黃秀霜,開出一堆社會福利支票,問題是若黃女士當選,伊所開出去的選舉支票敢免兌現?錢beh ùi叼位來?khah奇怪的是馬英九總統、行政院江宜樺院長、立法院王金平院長攏有落去輔選,攏無人提起黃秀霜的支票是m̄是tio̍h去借錢?抑是犧牲其他的建設預算?原來中國國民黨執政的縣市攏是chit-ê款,因為中國國民黨的中央政府tio̍h是作歹樣hō͘ in看hō͘ in學,借錢來建設來變作蚊仔館、借錢來發紅包,今仔日的苗栗縣就是一個上典型的例。賴清德市長堅持做tio̍h的代誌,有可能得罪一寡議員,但是整體來講是為台南市好。台南市民攏有看tio̍h、攏有體會tio̍h,所以舊年底賴清德市長才會the̍h tio̍h全台灣得票率上懸的七成二當選連任。
 
< Prev   Next >