首頁 arrow 綠色短評 arrow 林冠華是啥人逼死去的?

林冠華是啥人逼死去的? PDF 列印 E-mail
發表者 李南衡   
2015/08/05, Wednesday

反對教育部「烏箱課綱微調」北區聯盟發言人、莊敬高職進修部二年級學生林冠華,七月三十伊二十歲生日的透早、佇厝裡結束家己的生命,震驚全台灣。伊原本預定後個月tio̍h beh去日本學日本料理,一個樂觀充滿信心的少年人,那會用上無奈的方法結束生命?是啥人逼伊死去的?

逼死林冠華的人當然是教育部長吳思華。伊無管大學教授、中學教師、kah全台三百幾間高中學生反對,堅持beh tī八月公布實施「103課綱」。第一,行政法院已經宣判教育部chit-ê課綱違反程序正義是違法的;第二,成立一個檢核小組講課綱內容有需要小可「微調」,事實上是調了60%;第三,微調小組的成員到底是啥款人?教育一直m̄敢公布,所以講是「烏箱」;第四,內容有爭議的所在馬英九總統講有百外位,教育部講干單十七位niā-niā。教育部吳部長講beh kah老師學生溝通,干單去台中一中一場tio̍h叫m̄敢ah!學生一直要求beh kah吳部長對話,吳部長那龜咧bih hō͘恁chhōe無。學生才會一遍koh一遍的抗爭,最後七月二三半暝衝入去教育部長室chhōe部長。Hit暗三十個學生kah三個記者hō͘警察掠起來,林冠華雙手hông at佇後壁用手銬銬tio̍h,伊雖然有喝疼但是伊身軀挺挺挺表示伊無屈服;續落去教育部堅持beh告chit三十三個人,koh-tio̍h兩萬元交保,hō͘林冠華真大的打擊。伊問講:做tio̍h的代誌是按怎tio̍h hông掠hông起訴咧?In老父並無kā伊責備,干單講m̄-thang傷衝動niā-niā。   第二,鬥腳手逼死林冠華的是校長kah老師,in奉教育部長的命令去林冠華的厝裡訪問關心。校長佇in老母面前先關心幾句,而後問伊:「你敢知影你teh創啥?」「你有想清楚有瞭解無?」上蓋傷的是「你可能會留案底!」校長轉去了後,原本無反對伊的老母,有指責伊幾句。校長的否定老母的指責,大人干單會曉否定學生、無beh瞭解,hō͘林冠華真艱苦心、心理上已經崩盤去ah。   第三,鬥腳手逼死林冠華的是蔡正元kah邱毅。七月二九早起,立法院中國國民黨黨團召開「The̍h掉政治烏手,放過純真青年」記者會,蔡正元大聲喝講:教育部bē使撤告!蔡正元問講蔡英文為啥物beh kā chiah-ê少年囝仔訓練成作ISIS伊才會甘願是boh?邱毅罵講:民進黨利用未成年高中生,來作政治鬥爭、騙選票的拍手,這kah烏道大哥chhōe未成年少年囝仔替in辦案頂罪,有啥差別?Che攏大大傷tio̍h自主性真強的少年人的心。   第四,鬥腳手逼死林冠華的是對「烏箱課綱微調」冷淡無關心的所有台灣的 大人。大人的代誌舞kah hō͘學生囝仔去承擔。見笑死!
 
< 前一個   下一個 >