首頁 arrow 綠色短評 arrow 馬英九大戰馬英九!

馬英九大戰馬英九! PDF Print E-mail
Written by 李南衡   
Monday, 10 August 2015
真濟人知影聚集佇教育部門口的中學生是teh爭取啥物、反對啥物。學生希望教育部會tàng照舊課綱、也就是「101課綱」;學生認為「101課綱」應該實施三年了才來檢討,那會猶無一年tio̍h 作「微調」?學生反對的是烏箱微調課綱、也就是教育部硬八月初一公布實施的「103課綱」。原本微調的意思是由「檢核小組」巡巡看看,有啥物小可錯誤抑是錯字來作修正,無疑誤小小仔調的「微調」煞調60%的內容;檢核小組的成員,調了送去「課發會」的會議紀錄、表決情形攏無公布,所以叫作「烏箱」,chit點行政法院有判教育部違法。 八月初一,立法委員蔡正元佇面冊講:Chit遍歷史課綱微調最重大的意義,就是kā李登輝、陳水扁假藉台灣化的名,kā台灣史皇民化,kā依微調倒轉來正軌。蔡正元立委所講hông「微調」的「101課綱」,是馬英九總統上台了後的2012年所訂的。蔡正元立委的意思是講馬英九kā台灣史皇民化loh?七月二九,中國國民黨總統參選人洪秀柱接受TVBS專訪的時講tio̍h chit遍課綱微調,伊講舊的課綱太明確是「台獨史觀」,伊強調chit遍只不過是「微調」,kā「日治」改作「日本殖民統治」,che有啥m̄-tio̍h?伊講「微調」了的課綱是「中華民國史觀」。洪秀柱的意思是講「微調」前的「101課綱」是「台獨史觀」,伊m̄知he是馬英九總統上台了後2012年所訂的;伊講「微調」了的「103課綱」是「中華民國史觀」,che mā是馬英九總統所訂的課綱。原來chit幾個月台灣社會的紛紛擾擾,是「台獨史觀」的馬英九大戰「中華民國史觀」的馬英九。   講按呢mā m̄-tio̍h。真濟人懷疑,「101課綱」實施無一年,是按怎tio̍h作「微調」?原來北京有出聲,2012年六月十三,中國國台辦佇例行記者會頂面,發言人范麗青表示:教科書會對下一代產生重要影響。伊講台灣各界發出各種呼籲要求kā民進黨執政時期修改過的教科書tio̍h「撥亂反正」,改用「中華文化作主體」才是「正確軌道」。今年四月二九,chit遍課綱微調主腦者王曉波接受中國《觀察者》訪問的時,答覆課綱微調對中國國民黨選情的影響,伊講che會tàng hō͘藍營真大的凝聚力,藍軍會支持課綱微調。伊認為現在中國國民黨的大問題是無「國家目標」,需要有khah強的論述來說服群眾,課綱微調tio̍h是會tàng有chit款作用。伊講微調改上濟是地理,in照「一國兩區」的原則去調整,kā「中國第一大島是海南島,我國最高峰是玉山」改作「中國第一大島是台灣島,我國最高峰是珠穆朗瑪峰,我國台灣地區四面環海」。若照按呢講,是「台獨史觀」的馬英九大戰「中華人民共和國史觀」的馬英九。戰kah花kô-kô!戰kah hō͘你看無!
 
< Prev   Next >