首頁 arrow 綠色短評 arrow 跳船lō͘!隨人顧性命!

跳船lō͘!隨人顧性命! PDF Print E-mail
Written by 李南衡   
Friday, 14 August 2015
最近有一寡現任立法委員、有已經͘中國國民黨提名、有͘中國國民黨徵召的現任立委,無管是退黨跳去別黨、抑是干單退選無退黨,chiah-ê攏是hông講作是「棄船」「跳船」的現象,因為intio̍h有百二年歷史的中國國民黨chit隻大船直直beh沉落去ah,隨人顧性命,無緊跳船恐驚會kah大船作夥沉淪、走khah慢一絲仔,有可能͘大船沉了後的捲螺仔漩捲落去海底。 中國國民黨中央為tio̍h七月十九全國黨代表大會順利通過提名洪秀柱作總統候選人,tī七月十五展威斬五個黨員hông看。一來警告七月十九bē使有人來亂,二來警告想beh跳船的人。原本真嚴肅的一件開除黨籍的大代誌,煞變成一 齣笑詼的鬧局,台北市議員李慶元、bat擔任過立法院中國國民黨黨團書記長的張碩文兩人早早tio̍h宣布退黨、張加入親民黨競選三重市立委,中國國國民黨開除chit兩個人,害逐個攏起愛笑,m̄知捨人開除啥人。上冤枉的是中國國民黨立委紀國棟,伊一下hông開除黨籍,隨時失去不分區立委身分,中國國民黨原本想講開除伊,會tàng收tio̍h「刣雞教猴」的功效,可惜一大陣猴得tio̍h的「教示」是:我退選、無退黨,你會tàng kā我按怎?因為朱立倫全黨擁護伊出來代表中國國民黨選總統的時,伊mā是「退選無退黨」,beh按怎處罸別人咧?m̄-nā紀國棟chit雞白刣的,黨主席朱立倫mā舞kah滿面全豆花。   八月初六,親民黨主席宋楚瑜宣布參選總統,隨時有人預告後禮拜有三個中國國民黨立委跳船,兩禮拜後有五個跳船。事實上,宋楚瑜無hiah厲害。   有人講中國國民黨提名的總統候選人洪秀柱傷過lám、話koh濫摻講,足濟雞仔子驚hō͘ chit隻雞母踏死,所以才會跳船退選。Chit種指責對洪秀柱來講過頭沈重mā無公平,因為中國國民黨chit隻大船會駛kah直直beh沉落去,上主要是馬英九執政七年外hō͘人民傷心koh受氣,舊年九合一大選人民已經用選票表達一擺,中國國民黨才會「穿美國西裝-大軀(輸)」,馬英九mā小可知死,才會辭掉中國國民黨主席。事實上今年初tio̍h講無beh競選連任的立委有台北市的蔡正元、新北市的林鴻池、基隆市的謝國樑、嘉義縣的翁重鈞一寡人。上嚴重的是本屆全國立委上懸票當選的新竹縣徐欣瑩,今年一月二五宣布退出中國國民黨、三月十三組「民國黨」擔任主席,投入明年一月的立委大選。最近退選無退黨的猶有新北市的李鴻鈞、彰化縣的鄭汝芬、雲林縣的張嘉郡。Khah特別的是身為中國國民黨副主席、連任兩任嘉義市長的黃敏惠拒絕轉去嘉義市選立委。   看中國國民黨chit隻大船直直beh沉落去,當然是跳船,隨人顧性命!
 
< Prev   Next >