首頁 arrow 綠色短評 arrow Hit幾年台灣敢有抗日?

Hit幾年台灣敢有抗日? PDF 列印 E-mail
發表者 李南衡   
2015/08/31, Monday
七月初四,馬英九總統指示國防部佇新竹湖口舉辦抗日戰爭勝利70周年紀念活動。李登輝前總統指出,台灣人對che攏無關心。伊認為,馬英九chiah-ê動作,會使講是teh刁難日本,透過kah中國仝款「抗日」作͘中國歡喜。 八月二十出版的日本政論雜誌“Voice”(bó-ī-sù)九月號,有一篇李登輝前總統的專訪,伊講:「七十年前,台灣kah日本是仝一國,台灣對日抗戰當然m̄是事實。」伊講:「伊當時志願作陸軍,伊的兄哥李登欽志願作海軍,當時兩兄弟仔攏是日本人,為祖國而戰。In兩兄弟是為tio̍h保護家己的國家無惜性命。後來伊的兄哥作海軍陸戰隊死佇菲律賓,現在hông祀奉佇靖國神社,che是歷史事實,捨人mā bē-tàng kā伊扭曲。」李前總統講出伊本人ùi 1923年出世到停戰1945年二二歲chit段期間的親身經歷kah想法。伊講的hit幾年台灣確實無對日抗戰。   台灣人ùi 1895年日本殖民統治台灣頭一工tio̍h一直武力抗日無停,到1915年規模上大、犧牲上慘的噍吧哖事件,漢人武裝抗日才結束;原住民到1930年的霧社事件才結束。台灣人原本tio̍h是愛反抗不公不義的統治者,大清帝國統治台灣212年,三年一小反,五年一大反。日本殖民統治台灣二十年以後,真濟台灣青年已經有去日本甚至到美國、歐洲各國留學,無論出國護照、身分證明攏是日本國民,台灣人才認命tio̍h是日本國民,用武力抗爭白白犧牲m̄值,改用文化抗爭,爭取民主、自由、平等。是按怎hit當時朝鮮人拚獨立運動、台灣人無咧?因為朝鮮是日本用武力侵佔的、台灣是當時的統治者相戰拍輸割hō͘人的。Che mā是為啥物戰後中國國民黨政府殖民統治台灣,台灣人會為tio̍h台灣獨立拚生死,因為中國國民黨政府是武力佔領、用白色恐怖、戒嚴殖民統治台灣。   七十外年前的台灣人出世就是日本帝國國民,1942至1945年日本投降為止,台灣人作日本兵的有八萬外人,調去作軍屬的有十二萬六千外人,陣亡有三萬外人;「軍屬」有需要小可說明:中日開戰了後,日本為tio̍h對中國戰線的軍需物資kah補給工作,1937年九月開始招募台灣人作無正式軍人身分的「軍屬」。第一批台籍軍屬有參加上海的「淞滬會戰」。Chit批台籍日本兵hông叫作「台灣農業義勇團」,佇上海附近建設農場。戰爭擴大了後,台灣總督府招募koh-khah濟台灣籍軍屬去中國戰線擔任物資運輸,佇佔領區作工業kah農業建設。莫怪李登輝前總統會講,1937年至45年chit八年,講台灣有對日抗戰,是看tio̍h鬼!   若按呢,馬英九總統罵李前總統:「出賣台灣,暴辱人民,蹧蹋家己。」其實chit十二字,馬英九總統收轉去家己用,才有合。
 
< 前一個   下一個 >