首頁 arrow 綠色短評 arrow 啥人來空襲轟炸台灣?

啥人來空襲轟炸台灣? PDF 列印 E-mail
發表者 李南衡   
2015/09/07, Monday
2010年一月初九,中國的《中國評論新聞網》有一篇報導:〈台南第一家:88年“林百貨”修復動工〉,介紹南台灣第一間百貨公司,舉辦修復工程動工儀式,beh規劃作府城工藝博物館。文章講:「佇chit棟老建築內,猶原到處會看tio̍h歷史的影跡,像講上頂懸樓的壁牆,有留tio̍h日軍轟炸的炸彈孔。」那會寫出chiah無歷史常識的文字咧?因為作者用「中國人」觀點,想講chiah呢可惡的轟炸,罪魁當然是日軍!伊完全hit當時台灣是日本國的國土,來轟炸的是包括美國、蘇聯、中華民國在內的「盟軍飛機」。 2007年十二月,台北市文化局出版《二次大戰下的台北大空襲特展》第29頁記載:「中日戰爭爆發後,台北比日本其他領土攏koh-khah早遭受tio̍h空襲的洗禮,1938年(昭和13年)二月二三中晝,忽然間有ùi中國南昌、漢口基地起飛,由中華民國kah蘇聯飛行員混合編成的轟炸機部隊,無預警lòng入台灣領空,佇松山機場kah新竹轟炸了後tio̍h飛走去。台灣成作日本領土中第一個遭受空襲的所在。」三百年來頭一個來轟炸台灣的是十四台有畫中華民國國徽的蘇聯SB-2輕型轟炸機。1943年十一月二四,由陳納德率領的中美混合大隊,ùi中國飛來空襲新竹機場,1944年一月十一暗時十點空襲高雄kah鹽水港。   1944年十月大空襲:十月十二盟機約一千台空襲台灣、十月十四ùi航空母艦起飛450台轟炸台灣,炸彈那像落雨,死傷無數、火燒厝超過一萬間。暫停兩個外月了後,1945年一月初三到七月十九為止196工,盟機來台灣空襲80遍。一月初四400台、一月初九500百台、一月十五200台、一月十七B-29(空中堡壘)80台、一月二一450台,二月十八120台、二月十九150台,三月初三150台、三月十六150台、三月十八100台、三月二二70台、三月三十150台,四月初三85台轟炸機15台戰鬥機、四月初七60台、四月十一50台、四月十二80台空襲數點鐘、四月十三早起70台下晡35台、四月十六130台、四月十八90台、四月二十半暝來台北投燒夷彈、四月二三70台,五月初六100台、五月十一100台、五月十七70台半暝「疲勞轟炸」到天光、五月十八100 台、五月三十一大轟炸台北有炸tio̍h總督府真濟人死佇地下室,六月十七100台、六月十八60台炸基隆100台炸台中台南、六月十九130台、六月二二100台空襲台南高雄、六月二八50台、六月三十40台。其中二三十台以下的攏無算在內。   今年九月初一,中國國家主席習近平對連戰一陣人講:抗戰是包括台灣同胞在內的全民奮戰的結果。有影是看tio̍h鬼!
 
< 前一個   下一個 >